Klibur Roman Forma 120 Estudantes No  Prodúz Graduadu 35 Iha Kursu Lian Espanhol

SAPNEWSTL, DILI: Assosiasaun Klibur Roman (KR) distribui sertifikadu ba formandu hamutuk tolunulu resin-lima (35) iha Kampus Sentral UNTL, Formador Vensencio Guterres hateten Rejistu partisipante ba kursu Espanhol kuaze 120, kursu la’o durante fulan tolu, ikus mai 60 mak tuir teste no 35 mak konsege passa iha teste Final

Tuir Formador Vensencio Guterres hateten foufoun Rejistu partisipante ba kursu Espanhol kuaze 120, kursu la’o durante fulan tolu, ikus mai 60 mak tuir teste no 35 mak konsege passa iha teste Final no ohin bele fahe sira nia sertifikadu

ʺIta haree ba vontade estudante sira nian, tanba hanesan ohin introdusaun katak kuaze 120 pessoas mak tuir kursu ida ne’e maibe balun diminui, númeru komesa menus, sira la mai fila fali kursu, ikus mai estudante 35 mak passa no simu sertifikadu״. Tenik Vensencio Guterres ba Jornalista SAPNewsTL iha Kampus Sentral UNTL, 19/06/2022

 Nia hatutan Organizasaun KR hanorin ba nia atu kaer nafatin valores ita nia avó sira, uluk sira luta ba rai doben Timor-Leste, sira luta ho espiritu voluntarismu katak sira la hetan renumerasaun ruma sira konsege liberta patria no konsege hetan independensia, entaun ita mos nu’udar jerasaun husi sira, ha’u mos hakarak atu halo kontribuisaun voluntariu atraves husi klibur roman hamutuk mos ho organizasaun ida naran Joven Kreativu Hadomi Futuru

ʺSira ne’ebé mak ohin hetan ona sertifikadu, ha’u nia mensajen ba ita bo’ot sira hotu katak labele rai saida mak ita bo’ot sira aprende tiha ona, ita bo’ot presiza fahe fila fali ba ita maluk Timor oan sira ne’ebé mak presiza tanba aprende ne’e atu fahe, aprende la’os atu rai, tanba se wainhira ita rai mak neineik ba neineik nia sei nabén hanesan ita aprende katak wainhira ita foin aprende ita atinje objetivu ne’ebé mak ita iha״. Nia informa

Nia akresenta ko’alia lingua Espanhol ne’e hanesan ita bele ko’alia ita solidu ona maibé wainhira ita la pratika mak lakleur nia sai liquidu katak nia sei naben fila fali se wainhira nia liquidu ona mak nia sei sai fali gases katak nia suar nia lakon tiha ona tanba ne’e saida mak hetan ona tenke fahe para mantein nafatin kunesimentu ne’ebé mak iha.

ʺBa kolega sira ne’ebé mak falla iha ezame, ita bo’ot sira nafatin iha vontade ne’ebé di’ak atu mai aprende nafatin tanba iha ne’e ha’u prontu nafatin hodi gasta energia , gasta forsa tomak ne’ebé mak ha’u iha, ha’u hanorin ita bo’ot sira tanba ne’e mak falla ne’ebé mak ita bo’ot sira hasoru ita bo’ot sira presiza hamrik fila fali husi falla ida ne’e tanba baibain ema dehan Jatuh itu biasa tapi bangkit dari jatuh itu luar biasa tanba ne’e labele lakon esperansa atu aprende״. Nia fundamenta

Entretantu Estudante Atanázio Fátima Soares Gusmão sente orgullu tebes no agradese tanba liu husi aktividade non formal hanesan kursu ne’ebé mak atende durante fulan tolu ne’e bele aprende buat barak.

“Ha’u pesoalmente orgullu tebes tanba liu husi aktividade hanesan edukasaun non formal hanesan kursu ne’ebé mak ami atende durante fulan tolu nia laran ami sente aprende buat barak; ami aprende lingua Espanhol tanba lingua ida ne’e mais importante ba ami sira ne’ebé agora daudaun estuda medisina jeral ”. dehan nia

Atanázio Fátima Soares Gusmão  akresenta tan aprende lingua Espanhol tanba lingua ne’e famozu tebes iha mundu internasional nia matan, agora mos profesor barak husi Cubano ne’ebé mak agora dadauk hanorin iha ami nia eskola Departamentu Medisina Jeral iha UNTL tanba ne’e hakarak ka lakohi, ami tenke aprende duni, ami bele muda ami nia kuñesimentu tanba materia sira ne’ebé aprende iha Medisina Jeral ne’e kuaze hakerek ho Espanhol de’it.

ʺEspera katak liu husi lingua Espanhol ida ne’e bele fanun mos juventude sira hotu atu bele mai aprende lian Espanhol, ha’u nia esperansa katak liu husi sertifikadu de apresiasaun  ida ne’e bele aumenta tan ami nia kapasidade, la to’o de’it sertifikadu ida ne’e maibe ida ne’e hanesan apresisasun de’it no luta nafatin para aumenta ami nia kapasidade iha Lingua Espanhol nian״. Nia hakotu

Enkuantu, kursu ne’e hetan mos partisipa husi estudante ICS, UNPAZ, IOB, UNTL, DIT inklui universidade sira seluk, tuir planu sei kontinua formasaun ne’e ba estudante sira iha tempu badak

Jornalista : Luis dos Santos Pailofo

Editor       : Sergio Alves da Costa