Kobertura Vizita Papa Francisco ! Governu & Igreja Lansa Prosesu Akreditasaun Ba Mídia Sira
Imajem : Lansamentu Prosesu Akreditasaun Mídia Nasionál & Internasional kona ba kobertura vizita Sua Santidade Papa Francisco iha Timor-Leste.
SAPNewsTL, Dili – Governu Timor-Leste serbisu hamutuk ho Igreza Katólika liu husi komisaun organizadora, preparasaun ba vizita Papa Francisco nian, ofisialmente lansa ona portal registu online akreditasaun ba Jornalista nasionál no internasionál sira atu asesu kobertura ba vizita, Sua Santidade Papa Fransisco nia iha loron 9-11 Setembru.
Sekretariu Estadu Komunikasaun Sosial (SECOMS sigla Portugués), Expeditu Loro Dias hateten, prosesu akreditadaun ne’e ekipa media vizita papa francisco nian, iha Timor-Leste sei halo verifikasuan tuir dadus, hafoin submete dokumentus ba parte relevante hodi valida tuir prosesu ne’ebe iha.
“Prosesu akreditasaun liu liu ba kriteiru ne’ebe sira atu bele verifika, husi ekipa média ba visita amu papa nian, sekretariadu depois sei lansa prosesu akreditasaun ida ne’e hodi halo verifikasuan detallu ba dadus no dokumentu sira ne’ebe jornalista sira submete ba SECOMS, hafoin sei halo verifikasuan inklui mos autensidade ba informasaun ne’ebe klaru, los no valida fali dokumentos sira tuir kriteria”. Dehan Sekretariu Estadu Komunikasaun Sosial, Expedito Loro Dias ba jornalista sira iha Salaun Sekretariadu Vatikanu iha Timór-Leste,Tersa (16/07/2024)
Governante ne’e fundamenta, atu garante kualidade kobertura, profisionalidade iha produtu jornalistiku no fo asesu informasaun kredivel ba populasaun sira iha rai laran tantu iha rai-liur, nune’e sekretariadu loke rejistrasaun, no halo verifikasaun, molok fo akreditasaun ba jornalista sira hodi bele asesu iha fatin kobertura sira iha Tasi-Tolu, Palasiu Presidente Aitarak-laran, Katedral, Motael, Sentru Konvensaun Dili (CCD).
Espedito Dias akresenta, kriteria jornalista nasional no internasional atu hetan karta akreditasaun prezisa prense formulariu ne’ebe fo sai husi karteira profisional, Konselho imprensa (KI) kartaun identidade instituisaun no bele asesu liu husi website, no portal online sira.
Imajem : Lansamentu Programa Talk Show
Iha fatin hanesan, Dom Virgilio Cardial do Carmo da Silva fundamenta, Jornalista sira nia papel importante hodi halo kobertura durante vizita, Santo padre nian iha Dili, tamba ne’e akreditasaun ba média nasional no internasional ne’e importante tebe-tebes liga ba asuntu tekniku hala’o kobertura iha terenu tuir kriteria.
“Ita bele dehan katak tau ona fatuk inan ne’ebe importante tebes ba ita nia preparasaun ba eventu sua santidade Papa Francisco mai vizita iha Timor-Leste, atu fo hanoin mai ita hotu katak hakarak hatudu duni ba mundu buat ne’ebe diak no kualidade, hatudu ita nia identidade nu’udar pais ida, liu husi akreditasaun ida ne’e hakarak atu tais duni ida ne’ebe publika informasaun ho kredivel”. Dom Virgilio Cardeal do Carmo da Silva dehan
Dom Virgilio mos kongratula Sekretaria Estadu Komunikasaun Sosial (SEKOMS) Espedito Dias tanba bele konvida no lansa prosesu akreditasaun ba jornalista nasional no internasional, molok halo kobertura ba vizita Sua Santidade Papa Francisco iha Timor-Leste.
“Parabens ba SEKOMS ne’ebe organiza eventu lansamentu ne’e, dezeju bom traballu no susesu ba ita boot sira nia kobertura ba vizita Amu Papa Francisco mai Timor-Leste”. Nia sublinha
Iha biban ne’e, Lansa mos programa espesial kona ba talk show vizita Amu Papa Francisco, programa talk show ne’e sei transmite husi Mídia Estatal Radio Televizaun Timor-Leste, programa ne’e sei hahu iha fulan Agustu.
Entertantu, serimónia lansamentu portal registu online akreditasaun ba Jornalista nasionál no internasionál sira ofisialmente lansa direita husi, Sekretáriu Estadu Komunicão Sosiál, (SECOMS), Expeditu Loro Dias, Kordenador Jeral Altu Nivel em Ezersídiu, Ministru Administrasaun Estatal, (MAE) Tomas Cabral, Dom Virgilio Cardeal do Carmo da Silva SDB.
Jornalista : Ermelinda Soares & Marciana Fernandes