Komisiu Iha Tasi-Tolu, FRETILIN Promete Lori Moris Diak Ba Povu

SAPNewsTL, Dili : Partidu Frente Revolucionário Timor Leste Independente (FRETILIN) hala’o komisiu iha Tasi-Tolu, Lideransa Troika Lere Anan Timur haktuir laiha FRETILIN, CNRT mos laiha, tanba ne’e FRETILIN tenki marka diferensia no sai ezemplar ba partidu hotu-hotu

“Laiha FRETILIN, laiha mos CNRT, FRETILIN ne’e lulik, FRETILIN mak halulik buat hotu, tanba ne’e FRETILIN tenki marka diferensia, banati no ezemplar, ita moe kuandu nasaun seluk dehan, ami nia nasaun bainhira kampanha, ami hato’o programa, imi nia nasaun ba kampanha, trata malu, hatun malu no hasa’e malu, FRETILIN ita labele trata ema no hatun ema, Povu matenek ona haree partidu diak, lider diak, povu ne’e agora edukadu no sivilizadu”. Tenik Lider Troika Lere Anan Timur liu husi diskursu iha Tasi-Tolu, 16/05/2023

Lere Anan hatutan, Partidu FRETILIN tenki buka no lori moris diak ba povu, tanba FRETILIN nia misaun mak Liberta Patria no Liberta Povu, FRETILIN tenki manan hodi lori moris diak ba ema hotu

“FRETILIN mak manan, Deputadu sira ba parlamentu no ministru sira ba tur iha guvernu, sira tenki ba luku hamutuk ho nia povu iha loron sabadu no domingu, sira labele ba Bali ka Kupang, hamutuk ho povu hodi haree nia povu”. Nia dehan

Entretantu, iha komisu públiku ne’e hetan partisipasaun maksimu husi militantes no simpatizantes sira iha Kapitál Dili ne’ebe kompostu husi Postu Administrativu Dom Aleixo, Vera kruz, Nain Feto, Kristu Rei no Metinaru

Jornalista : Ermelinda Soares