Kompete Iha Asian Games, Governu Aloka 96,380 USD Ba Preparasaun
SAPNewsTL, Dili: Governu liu husi Konfederasaun Desportu Timor-Leste sigla portuges (CDTL) aloka orsamentu ho montante 96,380 USD ba atleta Timor-Leste (TL) husi federasaun sanulu halo preparasaun partisipa Asian Games iha sidade Hangzhou, China hahu iha loron 23 fulan setembru to’o loron 8 fulan outubru 2023.
“Ohin ita hala’o enkontru daruak hamutuk ho federasaun sanulu, ami explika katak governu liu husi Ministériu Juventude Desportu Arte Kultura (MJDAC) mai CDTL aloka orsamentu ba atleta sira nia preparasaun partisipa Asian Games tinan ne’e ho montante 96,380 USD, orsamentu ne’e ita sei fahe ba kategoria oi-oin maibe hahan mak prinsipal liu, tan ne’e nia orsamentu ho montante 68,170 USD ba modalidade 10, atleta ida sei hetan orsamentu hahan ho montante 30 USD iha loron ida durante loron 49”, dehan Prezidente CDTL Macario F. Sanches ba jornalista sira iha nia knaar fatin Caicoli, Dili segunda (31/01/2023).
Prezidente CDTL hatutan, ohin enkontru daruak nian ba preparasaun atleta sira ba Asian Games iha China, nune’e objetivu prinsipal sira diskute kona ba hahu preparasaun tekniku ba atleta sira tan ne’e atleta sira preparasaun hahu iha loron 1 fulan agostu to’o 18 fulan setembru 2023
Modalidade sira partisipa ne’e tenki halo orariu ho programa atu nune’e sira aban bele hahu ona no orsamentu hahan sira sei oferese direitamente ba federasaun sira atu jere hodi halo kontratu ho fornesedor prepara menu tuir federasaun nia hakarak ne’ebe tuir aprovizionamentu husi CDTL, durante loron 49
Macario informa, atleta husi federasaun sanulu ne’e rejistadu hotu iha komisaun organizador Asian Games nian maibe hela deit atleta husi tenis kampu mak seidauk konfirmadu nune’e aban sira sei komunika ho komisaun organizador katak atleta husi federasaun tenis kampu bele tuir ka lae.
CDTL hari’i ona ekipa kada Ema nain rua kontrola modalidade ida, ekipa ne’e sei hare’e atleta sira nia kualidade hahan, orariu treinu ho programa durante preparasaun loron 49, atleta sira daudaun ne’e hala’o treinamentu utiliza fundu solidaridade olimpiku la tama iha preparasaun ida ne’e maibe sira nafatin hetan subsidiu durante fulan rua tuir konkodansia CDTL ho federasaun katak atleta sira hetan fundu solidaridade olimpiku
Treinamentu lao nafatin iha rai liur no atleta sira treinu iha rai laran utiliza orsamentu husi governu ba preparasaun.
Nia afirma tan, ohin mos sira kolia atitude atleta ho treinador sira iha fatin treinu nune’e treinador ho atleta tenki hatene papel, problema tekniku atleta koalia ho treinador depois ba federasaun mak mai kolia ho ekipa sira destakadu iha federasaun depois mai hato’o iha CDTL karik atleta ho treinador mak la dixiplina hasai husi lista tuir konkodansia CDTL ho federasaun sira
Iha fatin hanesan, Prezidente Federasaun Karate-Do Timor-Leste Filomeno Soares hatete, ohin loron ba daruak sira husi federasaun partisipa Asian Games tinan ne’e enkontru ho estrutura CDTL koalia atleta sira nia preparasaun ba kompete Asian Games iha China nune’e husi federasaun karate-do rasik hetan orsamentu hahan ba preparasaun atleta sira nian ho montante 7,350 USD kompostu husi atleta nain lima ho treinador.
“Ohin loron ba daruak ami husi federasaun partisipa Asian Games tinan ne’e enkontru ho estrutura CDTL koalia atleta sira nia preparasaun ba kompete Asian Games iha China, nune’e ami rasik hetan orsamentu hahan ba preparasaun atleta sira nian ho montante 7,350 USD kompostu husi atleta nain lima ho treinador loron ida hetan 30 USD ba hahan durante loron 49”, tenik Filomeno
Filomeno haforsa tan, sira sei mos kontrola masimu sira nia atleta ba treinamentu nian mak hanesan kontrola dixiplina, saúde ho mentalidade maski la tama karantina tanba sira atleta ba kompete Asian Games reprezenta nasaun Timor-Leste ida ne’e mak importante ba atleta sira, hein katak atleta sira sei kompete ho dignu tanba iha jogu iha manan ho lakon maibe atleta sira hotu hakarak manan para hetan medalla mai Timor-Leste
Entretantu, total atleta sei kompete iha Asian Games tinan ne’e hamutuk nain-26 husi federasaun Atletizmu, Taekwondo, Boxing, Karate-Do, Tiru, Badminton, Tenis Kampu, Natasaun, Halterifilizmu no Voleibol Praia.
Reportajen: Augusto dos Santos