Komunidade Musulmanu Rekunhese Toleránsia Makaas Iha TL

Imajem : Imajem Presidente KONISTIL Pascoal Sidik Lemorai hamutuk ho Ustat Ibrahim Soares iha Masjid Annur Dili, 31/03/2025

SAPNewsTL, Díli : Hafoin selebra Idul Fitri no Hijriah ba dala 1446, Embaixador Indonesia iha Timor-leste Okto Dorinus Manik, saúda komunidade musulmanu atu mantein armonia no kontribui ba dezenvolvimentu, enkuantu komunidade sira rekunhese toleránsia buras iha Timor-Leste.

Tuir Embaixador Indonesia iha Timor-leste Okto Dorinus Manik hateten, komunidade musulmanu iha Timor-Leste moris ho armonia, paz no felisidade, nune’e iha selebrasaun Idul Fitri tinan ne’e nia parte enkoraja komunidade musulmanu sira hodi hametin liu tan armonia iha sosiedade.

“Ksolok tebe-tebes ba ita hotu, nu’udar embaixador Indonesia iha Timor-Leste hamutuk ho familia musulmanu hotu ami selebra loron Idul Fitri, hamutuk ba tinan 1446, loron espesiál ida-ne’e komunidade musulmanu iha mundu tomak festeza hamutuk, ha’u hein katak povu muslim iha Timor-Leste atu mantein armonia , dame, no pasiensia”. Dehan Embaixador Indonesia ba Jornalista sira hafoin termina Salat iha Masjid An-Nur, Kampu-Alor, Segunda (31/03/2025)

Imajem : Embaixador Indonesia iha Timor-leste Okto Dorinus Manik

Reprezentante Governu Indonesia iha Timor-Leste ne’e akresenta, nia parte observa katak tinan barak ona governu Timor-Leste aprova dia de toleránsia iha loron 31 fulan marsu hodi fó biban ba komunidade musulmanu sira ne’ebe hela iha Timor-Leste hodi festeza hamutuk Idul Fitri.

“Sosiedade Timorense toleránsia makaas ba diversifikasaun hanesan diferensia religiaun, ras no kultura ne‘ebe eziste iha sosiedade nia le’et, tuir ha’u nia haree komunidade sira toleránsia makas hanesan ita haree katak bainhira ami halo aktividade saida deit, governu no komunidade sira apoiu masimu, nune’e mos ami bainhira belun sira husi religiaun sira seluk hanesan katólika selebra natal no aktividade ami mos sempre apoiu ba sira,” nia hakotu.

Imajem : Pastor Ibrahim Soares iha Masjid Annur Dili, 31/03/2025

Iha oportunidade hanesan, Pastor Ibrahim Soares informa ba SAPNews katak, nia parte husu ba família musulmanu sira hodi moris iha domin, dame no respeitu malu hodi hatudu ezemplu no eduka oan sira ba futuru.

“Família sira tenki moris iha domin, fen ho laen tenki respeitu no hadomi malu, fen respeita laen no laen respeitu fen, labele baku no tolok fen no oan sira arbiru, ita tenki tanis hodi rekunhese ita nia sala hodi hatudu ezemplu diak no eduka oan sira ba futuru,” Tenik nia.

Idul-Fitri katak loron ne’ebé komunidade musulmanu selebra sira nia ksolok, livre no susesu durante jejum fulan ida loron 40 tanba bele tahan an to’o ohin loron kumpri doutrina hodi hadera an.

“Sarani Musulmanu selebra Idul-Fitri katak hahú fila fali han no hemu tanba durante fulan ida halo jejum, tahan sira nia an hodi la han no lá hemu, tahan ibun hodi la hasai liafuan ladiak, haree malu hanesan maun ho alin”.

Pastor Ibrahim fundamenta, loron 31 fulan marsu fó sentimentu solidariedade ba komunidade musulmanu iha mundu toman atu respeita valores umanu hodi hadame malu, evita komflitu, liafuan kro’at no insulta sira ne’ebe akontese iha sosiedade.

“Ohin ne’e tempu atu ita tenki fo deskulpa ba malu, haree malu no hakuak malu ho matan-ween, buka dame, dalan los no naroman ba malu iha mundu ne’e, Ita tenki iha toleransia ba malu, haree malu didiak, respeitu ba malu, fo oportunidade atu fo perdaun ba malu, asegura dame tanba ita la seluk la leet, ita mesak timoroan, ita iha relijiaun la hanesan maibé ita tenki hatudu domin, rekuñese pasadu no hari’i ita nia futuru ne’ebé diak liu”.Nia afirma

Imajem : Komunidade Musulmanu Isac da Costa de Jesus

Enkuantu, komunidade musulmanu Isac da Costa de Jesus konsidera loron Idul-Fitri hanesan loron ne’ebé importante tebes ba islâmiku sira mundu hodi selebra sira nia ksolok no susesu ne’ebé hetan durante fulan ida.

“Loron ohin ami selebra ami nia susesu ida ne’e katak durante fulan ida ami tahan an, halo jejum, la han no hemu, la fuma sigaru, entaun ohin ami selebra loron ksolok ida ne’e, tuir lolos ita bele kontrola an husi buat aat, ita bele hadia an diak liu no ser Musulmanu ne’ebe diak liu”.

“Ita joven, ita bele halo mudansa, bainhira ita hakarak, hakarak ne’ebé mai hosi laran, ita bele tahan an hosi hahalok demóniu sira, dala ruma ita provoka malu, oan ne’ebé la respeitu inan aman no lider sira karik, ita bele halo reflesaun hodi halo diak, respeitu ita nia inan aman no lider sira liliu haree malu hanesan maun alin”. Nia sublinha

Isac akresenta ho espíritu idul-fitri bele fanun ema hotu bele konkretiza valor jejum liu hosi perdua malu, agradese ba Maromak no hakbesik an nafatin ba Maromak hodi sai ema ne’ebé diak.

“Valor jejum ne’ebé ita hetan hosi Alquran (Bíblia), ita pratika iha ita-nia moris, tanis ba ita-nia salan hodi husu perdaun, harohan ba Maromak katak sein Maromak ita laiha buat ida, ita hakbesik an ba Maromak katak la hotu iha ne’e no sai ser ne’ebé diak liu”. Nia hakotu.

Entretantu, iha selebrasaun hijriah no Idul Fitri ba dala 1446 iha Masjid An-Nur Kampu-Alor ne’e partisipa husi Embaixador Indonesia ihaTimor-leste Okto Dorinus Manik, Prezidenti Kurador Fundasaun An-Nur Timor-Leste Abdullah Said Sagran, no Komunidade musulmanu sira ne’ebe rejide iha Timor-Leste

Jornalista : Marcela Mery da Costa