Konskista Medalla 12, Atleta TL Husu SEJD Kria Kondisaun, Abrão : Guvernu Prontu Apoia
SAPNewsTL, Dili : Atleta Paralímpiku konkista medalla 12 ba Timor Leste iha Asean Para Games, Atleta Teofilo Freitas husu governu tau atensaun maksimu no kria kondisaun ho fasilidade sufisiente hodi prepara no kompete ba eventu tuir mai.
“Ha’u nu’udár atleta ne’ebé hetan medalla osan mean tolu ha’u rekomenda ba ita nia governu liu husi SEJD atu nune’e jogu tinan oin mai tau atensaun maksimu ba ami, kria kondisaun no fasilidade sufisiente ba ami tanba eventu tuir mai ne’e kompetivu”. Dehan Teófilo Freitas ba jornalista sira iha edifisiu SEJD Lecidere, Díli Segunda-Feira,8/08/2022.
Iha sorin seluk, atleta husi modalidade Para Tenis Meza, Pascoela dos Santos Pereira mos rekomenda ba governu atu kria fasilidade sufisiente espesífiku ba atleta defisiente sira
“Hau nu’udár atleta ne’ebé hetan medalla osan mean rua no metan rua hakarak husu ba governu tau matan hela mai atleta defisiente ne’ebé iha potensial ba desportu, kria fasilidade sufisiente tuir espesífiku defisiente nian tanba ami prontu treinu hodi lori Timor Leste nia naran ba eventu Internasional”. Tenik Pascoela
Iha biban hanesan atleta husi modalidade para tenis meza Abelita Borges mos husu ba governu atu tau matan nafatin sira
“Ha’u nu’udár atleta hetan medalla osan mean rua no metan hakarak rekomenda ba governu liu husi SEJD tau matan nafatin ba atleta defisiensia atu nune’e lori nafatin Timor Leste nia naran hodi kompete iha rai liur” Abelita Subliña
Iha fatin hanesan atleta husi modalidade Hiit Besi António José Aniceto Serão mos husu governu tau atensaun ba atleta sira tanba durante ne’e sira treinu fasilidade la sufisiente ba sira kompara ho nasaun seluk.
“Ha’u hakarak rekomenda ba governu tenki tau atensaun ba atleta defisiente sira liu-liu hiit besi tanba treinu ho fasilidade la sufisiente maibé esforsu nafatin, bainhira ba tuir kompetisaun ema estranjeiru nia fasilidade kompletu kompara ho Timor Leste, treinu iha fatin ne’ebé la tama kategoria selesaun nasionál sente laran triste tanba sasan seidauk tuir standarte Internasional, so iha nasaun ne’e sasan treinu ba atleta defisiente la iha ne’ebé uza fali fasilidade non defisiente sira halo sira liman aleija hotu tanba sasan la merese atu atleta defisiensia uza”. Antonio afirma
Entretantu Sekretariu Estadu Juventude no Desportu Abrão Saldanha hateten, sei tenta hodi rezolve ba problema ne’ebé durante sira hetan atu nune’e sira halo preparasaun di’ak liu no governu sei apoiu ba sira tuir prestasaun ne’ebé sira hetan iha eventu ne’e.
“Ami sei tenta hodi rezolve ba problema ne’ebe durante ita nia atleta defisiente hetan atu nune’e sira halo preparasaun di’ak liu tan tanba ohin loron ho fasilidade minimu sira halo ona istoria ba nasaun Timor Leste ho medalla 12 iha Asean Para Games 2022 ne’ebé governu prontu nafatin apoiu sira hodi nafatin ba kompete iha kompetisaun Internasional sira iha futuru, guvernu sei lá husik ida iha kotuk maibé fo oportunidade hanesan no governu sei apoiu ba sira tuir prestasaun” Tenik Abrão
Jornalista : Augustu dos Santos
Editor : Luis Pailofo