Konstrusaun Valeta Tasi-Tolu, Produtu Lokal Kontamina Ho Rai Rahun

SAPNewsTL,Dili: Kompradór merkadu Tasi-tolu, lamenta kona-ba kualidade produtu lokál sira ne’ebé kontamina ho rai rahun, kauza husi konstrusaun valeta.

Tuir kompradora Agostinha Araujo katak konstrusaun valeta iha merkadu Tasi-tolu, nu’udár meiu ida atu rezolve kestaun inundasaun ne’ebé sempre akontese wainhira tempu udan monu rai, maibé iha prosesu konstrusaun ne’e, konvida mós problema foun, mak hanesan rai rahun ne’ebé kontamina ho produtu lokál sira hanesan modo,nst.

“Durante konstrusaun ne’e, fo impaktu tebes mai ami nia saude, tanba rai rahun barak tebes no besik los fatin fan modo nian, tan ne’e hakarak ka lakohi modo ne’e sei kontamina ho rai rahun”.Dehan kompradóra Agostinha Araujo,iha merkadu Tasi-tolu, Tersa-Feira,30/08/2022.

Señora ne’e mós hatutan, sira nafatin sosa produtu lokál iha merkadu ne’e, tanba laiha ona opsaun atu ba fatin seluk tanba kestaun distansia husi sira nia bairu, la permite ba sira atu sosa modo iha merkadu seluk.

“Ami iha ne’e, liu liu aldeia 12 de Outobru ne’e atu hola modo iha de’it terminal ne’e, tanba modo sira ne’e fan de’it iha ne’e. Atu ba sosa fatin seluk hanesan merkadu Manleu no merkadu Comoro labele tanba dook”, kompradora ne’e hatutan.

Iha fatin hanesan, Agostinho Mendonca hateten vendedór sira iha terminal Tasi-tolu mós konsiente ho problema ne’ebé sira hasoru, maibé sira nafatin mantéin sira nia negósiu no espera katak depois de konstrusaun ne’e bele rezolve problema inundasaun ne’ebé sempre akontese iha tempu udan.

“Konstrusaun ne’e fo impaktu bo’ot ida mai vendedór sira, maibé ami senti konstrusaun ne’e mós hala’o ba ami nia di’ak, ema  sosa nafatin de’it, maibé bee mak ami sosa beibeik atu rega modo sira ne’e, kompañia sira mós sempre rega hela de’it, maibé loron manas, kareta no motor la’o ba mai ne’e mak halo rai rahun barak ne’e ita mak tenke pasiensia de’it ona, se ita la pasiensia oinsa bele susesu”,Nia klarifika.

Entretantu, tuir observasaun Jornalista SAPNewsTL, aleinde husi konstrusaun valeta, estrada ne’ebé seidauk nahe aspal mos kontribui ba rai rahun nia suar no konstrusaun ne’e mos kauza ba engarafamentu kiik ida tanba mákina sira ne’ebé utiliza hodi hala’o konstrusaun ne’e okupa kuaze 50% husi estrada.

Jornalista: Ruivo da Costa Bonat

Editor: Ekipa Editorial