Selebrasaun Loron Konsulta Popular, PR Horta Preokupa Kualidade Estudante Iha TL
SAPNewsTL, Dili: Selebrasaun Loron Konsulta Popular 30 De Agustus Ba Dala XXIII, Prezidente Repúblika José Ramos Horta hateten hanesan obrigasaun estadu, obrigasaun pessoal nu’udar sidadaun marka prezensa iha ne’e para labele haluhan momentu povu atu mate.
Xefe Estadu ne’e hato’o nia hakruk ba fundadores sira hotu no Parabéns Ministériu Administrasaun Estatal tanba bele organiza atividade sira iha suku sira to’o Munisipiu hotu-hotu
“Ha’u halo hakruk ba fundadores Fretilin, Falentil, Komite Sentral Fretilin, Komandante boboot sira, sarjentu sira soldadu sira, ne’ebe mate no mohu iha funu laran, juventude aswa’in santa kruz atu ita nia historia para ke lori ita to’o iha referendum ida, Parabéns ba ministériu Administrasaun Estatal ne’ebe halo aktividade iha suku no iha munisipiu hotu-hotu”. Tenik PR José Ramos Horta iha Jardim 5 de Maiu, dili, 30/08/2022
Prezidente Repúblika ne’e afirma sempre prontu ko’alia ho lider hotu-hotu, prontu rona, sempre ko’alia lor-loron, kontaktu malu dala ruma kontaktu privadu, kontaktu ofisial, nu’udar Prezidente sei sai hanesan mahon ba partidu politiku sira, la iha deskriminasaun polítika no sosial
Entretantu, Nia preokupa estudante sira nia kualidade, asesu ba média sosial, sira lahatene Ministériu Administrasaun Estatal organiza atividade oioin Munisipiu sira
“Estudante sira nia kualidade edukasaun mos aat los tanba ita la hatene saida mak loron 28 de novembru, 20 de maiu, konsulta popular, ha’u hanoin problema boot signifika ita nia joven sira baruk ten. sira asessu ba facebook, whatsApp, média sosial barak maibe sira la hatene fulan ida nia laran ne’e ministeriu estatal ho munisipiu sira organiza aktividade lubuk ida”. Hatete PR Horta
Entretantu, joven difisiénsia Martino da Costa hateten nu’udar joven partisipativu, inovativu kriativu iha grupo organizasaun sente kontente ba loron konsulta popular
“Selebrasaun hanesan ne’e mai ami joventude difisiensia sente orgullu tanba ami bele partisipa iha loron sira hanesan ne’e, ami bele lembra fila fali herois no saudosu sira maka luta ba ita nia rai doben Timor-Leste”. Dehan Martino da Costa
Enkuantu, Joven difisiente ne’e husu ba instituisaun governu atu bele involve sira iha atividade ba futuru mai, nune’e ema ho difisiénsi sira bele sente saida mak guvernu prepara iha lron sira ne’ebe importante
Jornalista: Lolita Martins & Antonina Lopes
Editor: Ekipa Editorial