Vise PM Vatikanu Sei Inaugura Nunsiatura Santa Sé, Posibilidade Santu Padre Sei Vizita TL
Roma, SAPNewsTL : Iha Sorumutu entre Santu Padre Francisco ho enviadu Espesiál Extraordináriu Prezidente Repúlika, Kay Rala Xanana Gusmão, Papa Francisco sei delega Vise Primeiru-Ministru Vaticanu atu vizita Timor-Leste iha loron 19 fulan-setembru agora hodi inaugura Nunsiatura Apostólika Santa Sé iha Motael, Dili, iha loron 21 ne’ebé prosesu konstrusaun remata ona.
Entretantu, kona-ba vizita Santu Padre mai Timor-Leste, Papa Francisco sei haree posibilidade iha tinan oin
Xanana Nu’udar Enviado espesiál Presidente Repúblika hato’o ba Amu Papa hodi povo Katoliko Timor-Leste nia naran husu Amo Papa atu halo vizita ba Timor
“Amo Papa hatan ho dehan, sei estabelese uluk nia representasaun, hodi prienxe kriteria atu sai reprezentante permanente, nomos sei inaugura edifisiu ba funsionamentu servisu Reprezentasaun Santa Sé nian. Ho razaun hirak ne’e Amu Papa nia Vice Primeiru-Ministru hosi Vaticanu sei vizita Timor-Leste atu haree besik liu kondisaun hodi prepara atu sai nu’udar nunsiatura ketak”. Xanana tenik.
Iha parte seluk, Xanana ho Papa deskute mós planu vizita ba Timor-Leste ne’ebé tuir loloos realiza iha tinan kotuk, maibe adia, tanba situasaun pandémika no iha possibilidade ajenda ba tinan oin.
“Ha’u husu katak, posibilidade Papa atu vizita ba Timor, maibé Papa esplika katak, nia husu deskulpa, lae tinan kotuk nia ba tiha ona Timor-Leste, maibé tanba moras COVID-19 mosu, maka nia la konsege ba, maibé ami ko’alia ho hamanasa ituan, nia dehan haree tok tinan mai ne’e karik bele ba vizita,” dehan Xanana.
Xanana husu ba povu tomak atu hasa’e orasaun ba Na’i Maromak bele haraik nafatin bensaun no grasa ba Papa Fransisco nia kondisaun saúde ne’ebé tama ona idade 85.
Enkontru entre Xanana no Papa Francisco termina ho serimónia bensaun murak hosi Papa ba ekipa tomak inklui entrega prendas kaibauk no kafé Timor-Leste, enkuantu, Papa Francisco mós entrega prendas tersu no estatua, medalla agradesimentu no livru balun ne’ebé hetan bensaun entrega ba ekipa nu’udar sinal agradesimentu.
Hafoin enkontru ho Papa remata, Xanana oferese mós prendas Timor-Leste hanesan Tais, Kaibauk, Morten no kafe Timor-Leste ba Sekretariu Estadu Vaticano, Kardinal Pietro Parolin, Msgr. Edgar Parra, Suplente Ba Asuntu Jerál ba Sekretariu Estadu Vaticanu, Sekretariu Relasaun ba Estadu Vaticanu, Arsebispu Paul Gallagher, Sekretary of Relation With States, Joseph Murphy, Head of Protocol of the Vatican no Msgr. Bruno Bastos Lins, Deputy of Head of Protocol.
Delegasaun Timor-Leste ne’ebé akompaña Xanana hasoru Papa Francisco kompostu hosi Assesór Direct e Politiku Prezidente Repúblika, Tomás do Rosario Cabrál, Assesora Administrasaun Finasas Palasiu Prezidente, Dirce dos Reis Amaral, Asistente Enviadu, Vanessa Pereira, Ofisiál Fotografu Media Prezidente Repúblika, Eugénio Pereira da Silva no akompaña direita hosi Embaixadora Timor-Leste ba Vatikano, Juvita Rodrigues B. Ataide Gonçalves ho ekipa Protokolu, Sausia Soares no Jennifer Ventanilla.
Jornalista Vinsensius Saldanha Morais De Araujo