Kontente Sai Parlamentu Foinsa’e ! Genie : Ha’u Sei Aprende, Serví & Kontribui
SAPNewsTL, Dili : Hafoin partisipa iha Serimonia Solene Tomada de Posse ba Membru Parlamentu Foinsa’e Kintu Periodu 2024-2026, Ginie Esmeralda da Costa sente kontente tanba bele hetan oportunidade sai membru Parlamentu Foinsa’e Nian
“Ha’u sente kontente tebes tanba bele hetan oportunidade sai membru Parlamentu Foinsa’e nian, difisil bele simu konfiansa ne’e maibe ho foinsa’e sira nia apoia bele hola parte iha programa parlamentu foinsa’e, ha’u espera bele aprende barak no diak liu tan liu husi programa ne’e iha futuru”. Tenik Genie Esmeralda da Costa ba SAPNewsTL iha Salaun Multifunsaun GMN, 12/12/2023.
Genie hatutan, sai membru parlamentu foinsa’e ne’e hanesan luta ida hodi aprende lideransa, demorasia no edukasaun sidadania, oinsa bele kontribui ba dezenvolvimentu foinsa’e no servi foinsa’e sira.
“Sai parlamentu foinsa’e ne’e luta ida, atu aprende, kontribui no servi foinsa’e sira iha Lautém no Timor Leste”. Genie Esmeralda da Silva hateten.
Presidente Alumni Parlamentu Foinsa’e Timor Leste (APFTL) Zaulino Gomes da Silva haktuir Parlamentu Foinsa’e hanesan espasu ida husi estadu hodi prepara futuru lider kualidade.
“Alterasaun dahuluk rezolusaun guvernu nú. 47/2017, 16 de Agustu, Espasu Parlamentu Foinsa’e hanesan espasu aprendijajem, forum debate asuntu sira ne’ebe liga ho asuntu joven ninian, guvernu prepara hela atu prepara futuru lider kualidade”
Lider APFTL ne’e fundamenta “Parlamentu Foinsa’e mos halo debate ba kestaun sira hanesan Juventude iha edukasaun, saude, seguransa, empregu no partisipasaun sivika foinsa’e sira nian”. Nia sublinha
Iha fatin ne’e, Presidente Conselho Nacionál Juventude Timor Leste (CNJTL) Maria Dadí Magno konsidera Parlamentu Foinsa’e nakonu ho oportunidade, atu aprende kona ba lideransa, prátika demokrasia no aprende oinsa hola papel importante iha familia, igreja no nasaun
“Parlamentu Foinsa’e nakonu ho oportunidade, atu aprende kona ba lideransa, prátika demokrasia no aprende oinsa hola papel importante iha familia, igreja no nasaun, kaer metin prinsípiu demokrátiku, voluntarismu, sivismu, transparansia no responsabilidade”. Dehan Presidente CNJTL
Enkuantu, Partisipa iha serimonia tomada de posse ne’e hamutuk 141 ne’ebe eleitu demokratikamente husi kampanha no eleisaun ne’ebe halo iha loron 14 Novembru 2023. Entre sira Feto ida husi Postu Administrativu Cailaco Munisipiu Bobonaru mak la partisipa tanba laiha disponibilidade.
Serimonia ne’e marka presenza mos husi Membru Parlamentu Foinsa’e 4⁰ periodu, familia sira husi membru parlamentu foinsa’e 5⁰ periodu, inklui konvidadu sira seluk husi UNICEF, CNJTL, MJDAK no Membru APFTL sira
Jornalista : Ermelinda Soares