Kontribui $ 300 Ba Ahi ! Komunidade Sagamata & Onebu’u Sente Diskriminativu & La Ukun An

SAPNewsTL, Baukau – Komunidade  iha Aldeia Sagamata no Onebu’u, Suku Sagadate Postu Administrativu Laga Munisipiu Baukau kontribui $ 300 hodi  dada ahi ba ida-ida nia uma, nune’e komunidade  sira konsidera sente diskriminativu no la goza ukun rasik an.

Abel José Pereira ne’ebe ho idade tinan 46 informa komunidade Aldeia Sagamata no Onebu’u, Suku Sagadate kada familia halibur osan $100 hodi dada eletrisidade.

“Ami  iha inisiativa rasik tau osan hamutuk, kada uma ka’in tau $ 100 hodi dada ahi mai ami nia uma ida-idak, hamutuk osan hodi bolu tékniku sira mai dada ba ami ida-idak nia uma”. Tenik sidadaun Abel José Pereira iha Suku Sagadate, 10/08/2024

Abel hatutan, EDTL fasilita fiu metru tolunulu (30), enkuantu sira sosa rasik fiu, nune’e nia parte sente diskriminativu tanba governu monta prepagu hodi ezije sira selu.

“Ami hetan fiu metru 30 de’it, maibé metru 30 ne’e ami dada hosi estrada mai atu dada ba ida-idak nia uma ne’e fiu ami dada rasik, kada uma ka’in tau osan $ 100 dólar hodi sosa fiu, ami sente diskriminasaun tanba ami mak iha insiativa dada rasik ahi, maibe estadu mai tau fali prepagu ida ne’e ami komunidade la simu”. Abel hateten

Iha sorin seluk, Domingas Gusmão konsidera  sira seidauk sente ukun an tanba ukun an ne’e komunidade iha area rural la goza maibe komunidade sora iha sidade deit mak sente.

“Ami la senti ukun an hanesan ema sira iha sidade mak senti maibe ami sira iha foho ne’e la senti ukun an tanba ami to’o agora seidauk goza saida mak sira seluk goza, ami bolu no selu ema mak dada ahi ba uma kain kda-idak, depois governu mai monta prepagu, ami la simu”. Nia informa

Xefe  Aldeia Onebu’u, Lorenço Gusmão Pereira sublinha komunidade sira tau osan $100 ba sosa fiu no gasta osan $ 200 hodi sosa sasan eletróniku sira hodi monta iha kada uma ka’in.

“Ha’u Kordena ho inan aman sira hodi halo kontribuisaun osan kada uma kain ida $ 300 sosa rasik fiu hodi dada ba komunidade sira nia uma, liu tiha fulan neen EDTL,E.P husi Postu Laga mai monta prepagu, husu ba governu tenki  dada fiu boot hodi troka fiu ne’ebe kimunidade sosa antes ne’e”.

Komunidade Aldeia Onebu’u Suku Sagadate Posto-Administrativo Laga iha uma kain  hamutuk 75 mak hola rasik fiu hodi dada ba sira nia uma. Komunidade sira dada ai eletrisidade ba idak-idak nia uma hahú husi tinan 2021 no monta propagu iha 2022.

“Ami sente la satisfas ho sira nia atividade tanba dadaun ne’e ami uza hela fiu kiik metan ne’e. Fiu jeral ne’e komunidade kada uma ka’in kontribui $ 100, maibe fiu liga ba sasan  uma laran ne’e sura hamutuk $ 300.”

Xefe Suku Sagadate Aureliano de Jesus mós preokupa tanba komunidade sira obrigadu tenki hasai osan hodi sosa rasik fiu no dada ahi ba sira nia uma.

“Ami preokupa duni, ami enkontru hamutuk ho Administradór Postu Laga mós ami hato’o ona tanba komunidade sira iha inisiativa rasik tau osan hamutuk mak dada linha eletrisidade ba ida-idak nia uma, ami lori ona proposta dala tolu ba prezidente autoriedade munisípiu maibe to’o agora seidauk hetan rezultadu”.

Notísia ne’e SAPNewsTL kolleta liu hosi Programa Média Tour entre Assosiasaun Jornalista Timor Lorosa’e (AJTL ) hamutuk ho Oxfam iha Timor Leste ne’ebe foku ba asuntu mudansa klimátika.

Jornalista : Ermelinda Soares