Kontribui Ba Desenvolvimentu Rejional ! Singapura & TL Fortaleza Kooperasaun Bilateral
Imajem : Presidente Singapura Tharman Shanmugaratnam no Primeiru-Ministru (PM) Kay Rala Xanana Gusmão iha Istana Villa Singapura, 14/07/2025.
SAPNewsTL, Singapura : Enkontru Bilateral ho Presidente Singapura Tharman Shanmugaratnam, Primeiru-Ministru (PM) Kay Rala Xanana Gusmão apresia tanba re-afirma kooperasaun bilaterál entre Timor-Leste (TL) no Singapura hodi tau ideia hamutuk bá dezenvolvimentu rejionál.
Marciana Da Conceição Jurnalis – SAP News – TV
“Ha’u apresia oportunidade atu re-afirma ita-nia relasaun bilaterál ne’ebé forte no atu troka hanoin kona-bá dezenvolvimentu rejionál,” PM Xanana saran lia hirak ne’e iha ámbitu enkontru bilaterál ho Prezidente Repúblika Singapura, Tharman Shanmugaratnam iha Istana Villa Singapura, 14/07/2025. Sita Média-GPM
PM Xanana hato’o obrigadu bá Prezidente Tharman Shanmugaratnam tanba simu delegasaun iha reuniaun bilaterál ne’e no haksolok tebes atu fila hikas bá Singapura ho Timor-Leste nia belun ne’ebé valorizadu.
Timor-Leste apresia relasaun importante konfiansa no amizade entre nasaun sira. Timor-Leste haksolok tebes katak iha tempu badak Singapura sei loke Embaixada ida iha Dili, ida-ne’e hatudu hametin relasaun entre nasaun rua nian.
Iha tinan barak nia laran, Singapura fó apoiu importante iha administrasaun públika, formasaun téknika no governasaun bá Timor-Leste. Ida-ne’e simu ho di’ak tebes hosi rai Timor-Leste.
Timor-Leste hein atu harii iha fundasaun ida-ne’e no identifika área foun sira kooperasaun nian inklui komérsiu, investimentu, infraestrutura no edukasaun.
Xanana Gusmão dehan, viajen dezenvolvimentu Singapura nian kontinua inspira. Nasaun oitoan de’it mak hetan susesu hanesan ne’e hodi harii nasaun ida ne’ebé modernu, dezenvolvidu ho klareza hanesan ne’e kona-bá objetivu, estabilidade no unidade nasionál.
Ba Timor-Leste, iha lisaun sira ne’ebé iha valór kona-bá maneira ne’ebé Singapura investe ona iha ema, instituisaun no planeamentu bá tempu naruk.
Timor-Leste iha nafatin kompromisu tomak atu adere bá ASEAN no fó kontribuisaun pozitivu bá organizasaun rejionál ne’e.
“Ami agradese bá Singapura nia apoiu, partikularmente iha kapasitasaun no kooperasaun téknika. ASEAN importante tebes bá ita-nia rejiaun nia dame no progresu no ita iha kompromisu atu kontribui bá ninia susesu,” Xanana Gusmão hateten.
Timor-Leste hein bá adezaun formál iha Simeira bá dala-47 iha tinan ida-ne’e nia rohan, marku ida bá povu Timorense ho nia fatin iha Sudeste Aziátiku.
“Prezidente, ha’u agradese bá ita-boot nia apoiu no amizade ne’ebé kontinua. Ha’u hein atu aprofunda ita-nia kooperasaun bilaterál no hametin lasu sira entre ita-nia nasaun sira iha tinan sira tuir-mai,” nia hateten.
Enkontru bilaterál ne’e Primeiru-Ministru, Xanana Gusmão akompaña hosi Vise-Primeiru-Ministru no Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay; Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Assuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; Embaixadór Timor-Leste iha Singapura, Alexandre Tilman no Xefe Gabinete Primeiru-Ministru, Elizabeth Exposto.