Kopa Euro : Diverte An, James Husu Adeptu Sira Labele Insulta Malu

SAPNewsTL, Dili – Relasiona Kopa Euro tinan 2024, iha ne’ebé tama ona ba round of 16 , iha madrugada ne’e ekipa husi Nasaun Portugal kontra Slovenia ho skore 3-0 liu husi penalidade.

Hafoin Portugal manan ekipa Slovenia liu husi suta penaltu ho skore 3 a 0, rezultadu ne’e halo adeptu sira iha Timor-Leste halo komboiu haleu kapital Dili hodi hakilar no haklalak katak “Viva Portugal, Forsa Portugal no Viva Timor Leste”. Jornalista SAPNewsTL akompanha iha terenu Fatuhada, 02/07/2024.

Adeptu Portugal, James Clifford sente kontente tebes tanba ekipa Portugal konsege manan Slovenia ho skore 3-0. Adeptu Portugal ne’e konsidera normal iha jogu laran, wainhira xuta penaltu la tama tanba la fasil hanesan ema barak hanoin.

“Ha’u sente kontente tanba Portugal manan Slovenia ho skore 3-0, rezultadu ida ne’e fo orgullu ba adeptus sira hotu iha mundu tanba vitória ida difisil maibe konsege manan, maske Cristiano Ronaldo la hatama golu maibe ida ne’e normal iha jogu desportivu, entaun la preokupa kona ba la hatama golu”.

James husu ba adeptu sira hodi labele insulta malu maibe halo kampanha ho saudavel hodi anima an ho kopa euro 2024 tanba jogador internasional sira sente baibain iha jogu no luta hodi defende sira nia nasaun no foti sa’e sira nia rain.

“Esperansa Portugal manan kontinua hasoru ekipa França iha jogu kuartel finais, ha’u nia mensagem ba adeptus sira atu labele tolok malu no han malu maibe halo kampanha ho saudavel tanba mundu despotivu fo ba ita atu haksolok no hari’i damen iha mundu”. Tenik Adeptu Portugal, James Clifford ba SAPNews hafoin hala’o komboiu iha Dili, 02/07/2024

Enkuantu, hafoin jogu, Jogador Lejendariu Cristiano Ronaldo hateten, nia parte sente triste no kontente tanba la konsege hatama golu iha minutu 8 parte dahuluk no minutu 80 parte daruak, inklui la hatama golu iha penalidade.

“Tristeza primeiro, Felix ultimo, porque consegui passa na seguinte faze, embora muito dificil enfrenta Eslovenia durante 120 minutus no campo,(Sente triste dahuluk no ikus mai kontente tanba hasoru jogu difisil iha kampu hasoru Eslovenia maibe konsege passa)”. Hateten Cristiano Ronaldo ba Jornalista Internasional sira hafoin jogu iha loron, 02/07/2024

Durante jogu 120 minutus, ekipa rua la konsege halo golu to’o minutu hotu,  Iha parte penalidade, jogador na’in tolu husi nasaun Eslovenia la konsege hatama golu tanba salva husi guarda rede Portugal Diogo Costa, enkuantu Jogador Na’in tolu husi Portugal hatama golu tolu ba baliza Eslovenia.

Fo hanoin fali mos katak Iha jogu dahuluk entre Selesaun Nasional França hasoru Belgia, rezulta ekipa Fransa Manan Belgia Ho skore 1 a 0

Orseik, Selesaun Nasional Espenhol manan ona Georgia ho skore 4-1, Jerman manan ona Denmark ho skore 2 a 0, England halakon Slovakia ho skore 2-1 no Suiça halakon Italia ho skore 2 a 0.

Portantu, Jerman sei hasoru Spanha Iha kuartel final, England sei hasoru Suiça Iha kuartel final, no Portugal sei hasoru França iha jogu tuir mai.

Jornalista : Ermelinda Soares & Marciana da Conceição