KRAM Fo Regra La Implementa, Komplika Estabilidade, F-FDTL No PNTL Sei Responde
SAPNewsTL, Dili : Falintil Forsa Defeza Timor Leste (F-FDTL) hamutuk ho Polisia Nasional Timor-Leste (PNTL) sei la tolera sidadaun sira ne’ebe halo Krime hasoru nia membru sira tanba farda ne’ebe membru sira uza ne’e kulit lulik ida mak sira taka isin lolon.
“Ohin ami husi F-FDTL ho PNTL asina ona dokumentu ida ba operasaun konjunta ida para atu responde ba situasaun ne’ebe akontese iha rai laran liuliu juventude sira halo krime hasoru membru sira husi instituisaun rua ne’e tanba ami nia servisu konjunta ne’e hetan ona aprovasaun husi konsellu ministru ne’ebe dirije husi primeiru ministru rasik”. dehan Xefe Estadu maior jeneral F-FDTL Tenente Domingos Raul”. Falur Rate Laek liu husi konferensia imprensa ba jornalista sira iha kuarter jeral F-FDTL Fatuhada, Díli Sexta-Feira, 9/09/2022.
Falur Rate Laek akresenta, iha operasaun konjunta ne’e, forsa rua sei utiliza mós arma, tanba forsa rua ne’e treina loro-loron ho profisionál tebes ne’ebe estadu investe, tenke kaer duni kilat, kilat laiha ne’e arte-marsiál maibe tiru ka la tiru ne’e, iha regra nia laran tanba sira treinu ho profesional ona ne’ebe ho aktu kooperasaun ne’ebé iha ona, signifika sira-nia kompromisu bá oin maka sei servisu hamutuk liután, maske tuir lei ida-idak halo nia servisu, maibé koordenasaun entre forsa rua ne’e la’o nafatin hodi fó apoiu ba malu.
Jeneral F-FDTL informa, membru sira tenki hatene atributus sira uza ne’e kulit lulik ida ne’ebe mak taka isin lolon ne’ebe eroi no mártir sira nian
“Farda ne’ebé imi hatais ne’e , boina ne’ebé imi taka, ne’e la’ós kualkér uniforme ida, imi tenke hatene, ida ne’e kulit lulik ida mak taka imi nia isin lolon ne’ebe ita nia eroi no martires sira nian tanba dala barak problema sosiál ruma mosu, ne’ebé envolve membru F-FDTL ho PNTL, ita nia ema sira sempre fó sala polísia ho militár sira, labele fó sala beibeik nune’e ha’u fo hanoin ba ha’u nia membru sira, F-FDTL ho PNTL, tenke hatudu brani, tenke preparadu, treinadu atu responde buat ne’ebé di’ak no a’at”. Tenik Falur
Iha biban hanesan Segundu Komandante Jerál Polisia Nasional Timor-Leste (PNTL), Komisáriu Polísia Mateus Fernandes hatete, akontesimentu problema entre arte marsiais sira iha munisipiu sira inklui Sidade Díli komplika ba estabilidade nasional
“Akontesimentu problema entre artemarsiais sira mosu iha ita nia munisipiu sira inklui sidade Díli komplika ba estabilidade nasional sai hanesan preokupasaun ida ba ita nia governu nian ne’ebe ita nia governu hasai ona rezolusaun 26 iha loron 7 fulan Setembru 2022, atu oinsa orgaun F-FDTL ho PNTL hasoru ba problema ne’ebe ita nia nasaun enfrenta tanba instituisaun rua ne’e defende legalidade demokratiku no dixiplina tuir lei ne’ebe vigor” tenik Mateus
Segundu komandante ne’e fundamenta, operasaun ida ne’e, instituisaun F-FDTL ho PNTL afirma konkordánsia sira ne’ebe arte marsial hala’o ho KRAM katak sira sei tuir regulamentu sira ne’ebe iha KRAM maibe durante ne’e, KRAM fó ona regra atu regula arte-marsiál mais la implementa iha kraik, tanba ne’e, instituisaun rua hamriik para afirma saida mak durante ne’e lei sai ona, maibé la implementa iha kraik nafatin halo komunidade kontinua hakfodak, pániku ne’ebe halo sidade Dili ne’e sai bandidu mak nakonu portantu sira tenke asegura ida ne’e ho operasaun konjunta iha munisipiu sira liu-liu iha sidade Díli.
Reportajen : Augusto dos Santos
Editor : Ekipa Editorial