PNTL Garante Lei No Ordem, Mandati Husu Ema Hotu Asegura Seguransa
SAPNewsTL, Dili: Bankada Governu liu husi Partidu Frente Revolusionáriu de Timor Leste Independente (FRETILIN) husu ba Polísia Nasionál Timor Leste (PNTL) atu mantein seguransa hodi nune’e bele prevene konfrontu entre arte marsiais no arte rituais.
“Ita nia Polisia ne’e filozofia iha pontu tolu mak sira tenki tau iha sira nia ulun, vezibilidade, ema tenki haree sira iha fatin hotu-hotu, kuandu ema haree sira iha fatin hotu-hotu ita nia sosiedade brani ajuda sira fo seguransa, kuandu ita nia sosiedade iha ona tendensia para envolve an ho Polisia sira halo seguransa”. Dehan Deputadu Bankada FRETILIN Deputadu David Dias Ximenes Mandati iha Resintu Parlamentu Nasionál (PN), Kuarta-Feira, 7/09/2022.
Deputadu ne’e akresenta, Polisia tenke garante lei no ordem, garante estabilidade, garante hakmatek asegura ema no sasan ema nian.
“Ita nia polisia ne’e saida mak sira atu halo, atu garante lei ordem, seguransa ho trankilidade, atu asegura ema, sasan ema nian, integridade fizika ho ema nia rikusoin, atu garante tan instituisaun demokratika ninia servisu”. Tenik nia.
Nia hatutan, bele fo sala ba joven no arte marsial sira maibé polisia mos tenke garante seguransa.
“Ita bele fo sala ba ita nia joven sira tuda malu, ita bele fo sala ita nia arte marsiais sira, lae ita mos tenki dehan garante seguransa ne’e oinsa, se ema mak ita la garante ona, oinsa asegura ema nia sasan”.
Entretantu, deputadu ne’e mos husu ba jornalista sira atu mosu uluk wainhira problema mosu iha sosiedade molok Polisia sira to’o atu hasai fotografia antes nu’udár evidénsia ida bainhira prosesa ba oin.
Jornalista: Sergio Lelan
Editor: Ekipa Editorial