TL Sei Selebra Loron Dezlutu Saudozu Max Stahl No Sebastião Gomes

SAPNewsTL, Dili: Komisaun Organizadora ba Dezlutu Max Stahl no komemorasaun 28 de Outobru loron falesimentu juventude loriku as’wain Saudozu Sebastião Gomes ba dala tolunulu resin ida (31) hala’o sorumutu ho Prezidente   Konsellu Imprensa (KI), objetivu husi sorumutu ne’e hodi informa no aprezenta preparasaun servisu komisaun nian ba konsellu Imprensa de Timor-Leste.

Tuir Prezidente Konsellu Imprensa Virgilio da Silva Guterres katak  prezensa husi Sentru Vizual Max Stahl no Komisaun organizadora ho objektivu prinsipal ida mak atu hala’o serimonia dezlutu ba Saudozu Max Stahl no Saudozu Sebastião Gomes ne’ebé sai autor prinsipal ne’ebé kontribui ba Rezisténsia Maubere liu husi asaun Masakre Santa Cruz.

“Ohin Ami hanoin maluk Sira husi sentru vizual  Max Stahl nian ho komisaun organizadora ba serimónia dezlutu Max Stahl nian  hodi mai aprezenta  ba Konsellu Imprensa, planu ne’ebé sira iha hodi Ita hamutuk atu selebra loron mate Saudozu Max Stahl nian ho Saudozu Sebastião Gomes nian”. Dehan Prezidente Konsellu Imprensa Virgilio da Silva Guterres (LAMUKAN) ba jornalista iha Kintal bo’ot CI, Segunda-Feira,12/09/22.

Prezidenti ne’e mos hatutan, Konsellu Imprensa sei hola parte maksimu iha parte publikasaun no mos sei kontribui hodi halo preparasaun hamutuk ho komisaun organizadora.

“Konsellu imprensa mos hato’o ona nia komprimisu atu hato’o ba diretór koperasun nian no mos sei hola parte iha komisaun organizadora nian hodi prepara ba selebrasaun loron 28 de Outobru no 12 de Novembru nian ba dala ida iha tinan Ida ne’e”. Prezidenti ne’e deklara.

Iha sikun seluk komisaun organizadora Max Stahl, Rogeiro Castro klarifika, sorumutu ne’ebé hala’o entre Prezidente Komisaun Organizadora no Prezidente Konsellu Imprensa nu’udar meiu ida atu informa ba média kona-ba determinasaun loron selebrasaun ba autor importante sira husi rezistensia Masakre Santa Cruz nian inklui halo aprezentasaun planu selebrasaun nian.

“Ohin Prezidente Komisaun Organizadora mai hasoru Preziente Konsellu Imprensa atu informa de’it katak atu halo seremonia selebrasaun loron mate Saudozu Max Stahl ho Saudozu Sebastião Gomes nian ba iha loron 28 de Outobru no 12 de Novembru ba iha tinan Ida ne’e”. Nia infroma

Entretantu, Prezidente komisaun ne’e mos planeia sei halo semináriu no halo refleksaun kona-ba Saudozu nain rua ne’e no lori ai funan husi igreja Motael to’o iha Semiteriu Santa Kruz.

“Ami mos sei iha planu ba iha loron 27 de Outobru, sei halo semináriu ba iha loron 28 de Outobru no 12 de Novembru nian, iha loron 28 de Outobru ita mos sei iha serimónia refleksaun no animasaun, lori ai funan la’o  husi igreja Motael to’o iha semitériu Santa Kruz hodi Rai ai funan matebian nain rua Saudozu Max Stahl ho Saudozu Sebadtião Gomes nian iha tinan ida ne’e”. Nia hakotu

Jornalista: Antonio Tilman

Editor: Ruivo Bonat