![La Kompete ELPAR 2023, Partidu FM Konsidera Desizaun TR La Justu La Kompete ELPAR 2023, Partidu FM Konsidera Desizaun TR La Justu](https://sapnewstl.com/wp-content/uploads/2023/04/IMG-20230402-WA0000.jpg)
La Kompete ELPAR 2023, Partidu FM Konsidera Desizaun TR La Justu
Imajen: Estrutura Partidu FM Halo Konferensi Imprensa La Desizaun TR Iha Pantai Kelapa, Dili Sesta (31/03/2023).
SAPNewsTL, Dili: Relasiona ho desizaun Tribunal Rekursu ne’ebe la admite Partidu Frente Mudansa (FM) hodi kompete iha Eleisaun Parlametar (ELPAR) 2023. liu husi komunikadu imprensa Partidu FM konsidera desizaun Tribunal Rekursu (TR) la justu tanba la admite partidu ne’e atu partisipa iha eleisaun tinan 2023
“Ami konsidera desizaun husi TR nian ne’e la justu ka la imparsial hasoru familia boot Partidu FM iha rai laran no rai liur atu kompete ELPAR 2023 tanba antes ne’e TR deside ona katak la admite lista kandidatu partidu FM ba ELPAR iha loron 21 fulan maiu 2023, desizaun ne’e hamutuk iha Dili liu husi karta ho nu 0023/23.TRDIL iha loron 25 marsu 2023 liu husi plenaria TR asina husi juiza Jacinta Coreia da Costa (Relatora) Deolindo do Santos (Presidente), Maria Natercia Gusmao no Duarte Tilman”, dehan sekretaria jeral partidu FM Daniel Perreira ba jornalista sira liu husi konferensia imprensa iha Pante Kelapa, Dili sesta (31/03/2023).
Sekretariu Jerál hatutan, Estrutura Partidu FM lideradu husi Ricardo Cardosso Nheu konsidera partidu ne’e legal tanba hetan legitimidade liu husi kongressu nasional realiza iha loron 27 to’o 29 fulan maiu 2022 no rezultadu kongressu ne’e publiku ona iha jornal republika, maibe iha grupu ilegal ida iha lideransa husi Egidio de Jesus hatama lista kandidatu ba TR atu rejeita lista ne’e iha loron 10 Fulan marsu 2023.
Nia informa, sira mos aprezenta ona faktu lubuk ida inklui kronolojia kona ba kazu Egidio de Jesus nian komesa husi desizaun forum Partidu FM nian ne’ebe suspende kargu Prezidente Interinu Egidio de Jesus no tribunal distrital Dili ninia desizaun hasoru Egidio de Jesus ne’ebe komete kazu ba osan partidu nian, inklui konta bankaria ilegalmente Egidio de Jesus loke iha BNCTL no ikusmai Tribunal distrital Dili blokeia konta refere, sira hare katak iha karta husi TR hakerek bele hato’o rekursu no iha karta seluk la admite rekursu ne’e hamosu interpretasaun ba TR iha failansu no juiz sira ne’ebe pertense ba plenariu TR nian tenke rekonese sira Nia failansu hirak ne’e.
Daniel Akresenta tan, sira lamenta ba juiz sira tanba laiha vontade atu le’e dokumentu hirak ne’ebe sira submete ona ba iha TR ne’e laiha feedback no sira mos aprezenta pedidu atu rejeita lista kandidatura ne’ebe aprezenta husi grupu ilegal ne’ebe lideradu husi Egidio de jesus, ne’e mos TR la iha resposta tan ne’e liu husi konferensia ida ne’e sira husu ba prezidente republika, ba governu Timor-Leste no ba orgaun judisiariu tomak atu tau matan no fo atensaun atu nune’e futuru Timor-Leste nian iha justisa los ho justu, no ba juiz sira ne’ebe halo kna’ar iha TR tenke livre latuir interese politiku no labele iha tendensia atu sai parte husi konspirasaun politika.
Reportajen: Aquelina Magalhaes