Imagem : Vise Ministru Asuntu Parlamentar Adérito Hugo lansa Jornal Parede Digital iha ETI-Dili, 28/04/2025
SAPNewsTL, Díli : Governu liu-husi Vise-Ministru Asuntu Parlamentar (V-MAP), Aderito Hugo akompaña husi Diretor Jeral Sekretáriu Estadu Komunikasaun Sosiál (SECOMS) no Diretor Jeral Polisia Sientifika Investigasaun Kriminal, (PSIC) ofisialmente lansa programa Website Jornal Parede Digital, ho tema “Papel Estudante Iha Era Mídia Modernu”
Iha intervensaun Vice-Ministru Asuntus Parlamentar Aderito Hugo hateten, nia parte reprezenta Ministru Trasporte no Telekomunikasaun, no Sekretáriu Estadu Komunikasaun Sosiál husu ba estudante no Públiku atu kuidadu ho ameasa tanba Sosiedade ida ne’ebe sivilizadu bele konvense ema sai Sosiedade ida avansadu, maibé sei lori mós impaktu, influensia negativu ba públiku bainhira utiliza plataforma digital la tuir formatu ne’ebe lolos.
“Ha’u reprezenta Ministru Transporte no Telekomunikasaun, Sekretáriu Estadu Komunikasaun Sosiál, ne’ebe halo parseiru ho Eskola Tekniku Informatika (ETI), ohin ita halo lansamentu ba programa dahuluk Website Jornal Parede Digital ne’ebe brilhante tebe-tebes apoiu ba dezenvolvimentu setor komunikasaun iha rai laran, maibé dezenvolvimentu digital iha ameasa ba ema ne’ebe uza la tuir dalan los”.Dehan Vice-Ministru Asuntus Parlamentar Aderito Hugo liuhusi nia intervensaun iha eskola ETI, Manleuana, Segunda (28/04/202).
Governante ne’e hatutan, Jornal Parede Digital parte ida husi programa ne’ebe dezeiña iha plataforma digital, nune’e Governu tau iha politika dezenvolvimentu digital atu fó biban ba komunidade sira, reforsa identidade Timor-Leste nian hanesan identidade kultural, no religiosu ne’ebe transforma ba pratika iha dezenvolvimentu plataforma teknologia informasaun modernu.
“Se ita la prense teknologia digital ho diak, ita nia nia identidade kultural ne’e sei sai ezemplar ne’ebe ladiak iha ita nia informasaun sira, tanba ne’e mak iha kontestu ida ne’e duni husu ba estudante sira hotu atu utiliza plataforma digital ida ne’e hodi transforma imi nia kriatividade no dezeña imi nia ideia sira ho diak iha informasaun sira ne’ebe iha”.
Diretor Eskola Secundária Tekniku Informatika (ETI), João Gaio
Iha fatin hanesan, Diretor Eskola Secundária Tekniku Informatika (ETI), João Gaio dehan, prezensa teknologia digital hamosu tendênsia oioin, nune’e Eskola Tekniku Informatika (ETI) Dili agradese ba Governu konstitusionál dasia tanba bele fó espasu ba estudante sira hodi hato’o sira nia preokupasaun, dezafiu no oportunidade sira liu husi Website Jornal Parade Digital.
Tuir Diretor ETI João Gaio deklara, mundu agora labele ses husi teknologia maibé ema ida-idak tenki hakuak formatu teknolojia sira hotu hodi promove kriatividade estudante ida-idak nian ba futuru, liu husi asesu no kompartilha ba jornal parede online iha média sosial.
“Jornal Parede Digital hanesan instrumentu ida atu dezenvolve ema sira ne’ebe abitua ho metodu hakerek iha plataforma online no offline sira, tanba ne’e ohin loron mudansa ba teknologia ita labele ses, maibé buka hatene kona-ba plataforma digital ne’ebe lori vantajen pozitivu no negativu ba utilizador sira”.
Entretantu, serimónia lansamentu Website Jornal Parede Digital ne’e partisipa husi Vice-Ministru Asuntus Parlamentar, Aderito Hugo, Diretor Jeral SECOMS, Diretor Jeral Polisia Sientifika Investigasaun Kriminal, (PSIC) Diretor Eskola ETI Dili, Presidente Fundasaun Klibur Mata Dalan, Diretora Ezekutivu ChildFund, no reprezentante estudante sira husi eskola, Sekundariu Jeral no Tekniku Vokasional 12.
Jornalista : Guilhermino Ramos da Cruz