La’os Duni Arbiru Povu ! Governu Sei Indemniza & Estudante Apresenta Dadus Ba PM
Imajem : Primeiru Ministru Kayrala Xanana, hafoin reuniaun semanál ho Prezidente Repúblika (PR), José Ramos-Horta iha Palásiu Prezidensiál Bairru-Pité, kinta (09/01/2025). Foto : Media PM
SAPNewsTL, Dili : Relasiona ho eviksaun ne’ebe governu Liu hosi SEATOU halo ba komunidade uma-kain 288, governu rekolla ona konta bankária hosi família 288 hodi halo indeminizasaun ba komunidade afetadu sira.
Tuir informasaun ne’ebe SAPNews asesu liu hosi Pajina Ofisial Primeiru-Ministru (PM), Kay Rala Xanana Gusmão haktuir katak komunidade ne’ebe hetan eviksaun hosi Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias sei hetan indemnizasaun.
“Hotu-hotu sei hetan, laiha ema ida ne’ebe la hetan indemnizasaun, governu simu ona konta bankaria, governu la’os duni arbiru ninia povu”. Tenik Xanana hafoin reuniaun semanál ho Prezidente Repúblika (PR), José Ramos-Horta iha Palásiu Prezidensiál Bairru-Pité, kinta (09/01/2025).
Xefe Governu aviza bá família hirak ne’ebé seidauk simu indemnizasaun hosi Governu bele haruka karta direta bá Gabinete atu bele orienta Ministériu relevante hodi haree no responde.
Husu mós atu rekolla dadus kompletu kona-bá estudante universitáriu sira ne’ebé mak pertense bá família 288 ne’e hodi aprezenta bá Primeiru-Ministru.
Governu hakarak salva família hirak ne’e tanba konstrui uma iha área ne’ebé mak risku tebtebes hosi inundasaun, no realidade hatudu katak iha uma lubuk ida mak mota Comoro lori iha 04 Abril 2021 bainhira akontese udan boot durante kalan tomak.Tuir dadus ne’ebe SAPNews asesu katak uma kain hamutuk 361 mak lakon hela fatin tanba konsidera hela iha fatin risku.
Komunidade balun mos governu fasilita ona ho transporte hodi fila fali sira nia rai moris fatin, komunidade afetadu sira mai hosi RAEOA, Ermera, Likisa, Manatutu, Aileu, Baukau, Lautem, Bobonaru inklui munisipiu sira seluk, entre sira balun mos deside hela fatin iha kos no la fila ba munisipiu.
Jornalista : Dircia Baptista Belo
