Liga Timorense 2023, Ponta Leste Otimista Manan Assalam
Imajem Jogador klube AS Ponta Leste iha Estadium Munisipal Dili kuarta, (01/03/2023).
SAPNewsTL, Dili: AS Ponta Leste Optimista manan Assalam FC, iha jornada daruak divizaun dahuluk Liga Timorense epoka 2023 tanba hakarak hetan pontu tolu hodi muda pozisaun iha tabela klasifikasaun.
“Daudaun ne’e AS Ponta-Leste atu joga ba jornada daruak kontra Assalam FC, foin dadauk iha jornada dahuluk ami impata ho Academica FC, ho impata ida ne’e ami hadia failansu sira ne’ebe ami halo ne’e no durante semana ida ami halo preparasaun, ami hakarak jornada daruak ne’e ami bele hetan rezultadu ida diak, tanba Assalam FC foin dadauk hetan pontu tolu tantu sira mos hakarak kontinua ho sira nia vitoria ida ne’e ba oin no mos preparadu ona hodi kontra Assalam”, Dehan Treinador AS Ponta Leste Edi Fernandes ba jornalista sira liu husi konferensia imprensa iha Estadium Munisipal Dili kuarta, (01/03/2023).
Edi hatutan, Assalam FC iha jogadores estranjeiru nain 3 ne’ebe agresivu tebes tantu husi baliza defeza no avansadu no sira mos sei reforsa sira nia avansadu para oinsa atu bele sobu sira nia defeza no sira mos hadia sira lina klaran no failansu balun iha sira nia parte defeza nian.
Iha fatin hanesan treinador Assalam FC Gaspar Soares Amaral hatete, sira preparadu ona kontra AS Ponta Leste rezultadu minutu 90 mak sei determina
“Ami sempre halo preparasaun kontra ekipa adversariu sira liu liu semana ida ne’e kontra AS Ponta Leste, garante atu manan depois mak ita hare’e minutu 90 mak determina tanba ita hotu hatene katak Ponta Leste ekipa ida ne’ebe mak diak”,
Gaspar afirma tan, sira mos rekoñese AS Ponta Leste ekipa ida ne’ebe favoritu para bele sai kampiaun iha tinan ida ne’e maibe mos laos sira ekipa ida ne’ebe mak diak ne’ebe para Assalam labele halo preparasaun hodi kompete hasoru sira maibe Assalam mos halo preparasaun diak para atu bele joga hasoru Ponta Leste.
Reportajen: Augusto dos Santos