Loron Mundial Idozu ! Leão XIV : “Hakuak & Vizita Ferik Katuas Sira, Hanesan Dalan Hasoru Jesus”.
Imajem : Papa Leão XIV iha Vaticano, 10/07/2025. Foto : Vatican News
SAPNewsTL, Vaticano : Iha ámbitu loron mundial ba avó sira, Papa Leão XIV fo nia mensajen ba idozu sira ba dala 5, ho títulu “Ksolok ba ema ne’ebé la lakon esperansa”.
Marciana Da Conceição – SAPNewsTL
Pontífise hanoin hikas katak Jubileu ne’e tulun ita atu deskobre katak esperansa iha idade hotu-hotu, “fonte perene ksolok nian” no “bainhira koko ho ahi moris naruk nian sai fonte bensaun ne’ebe kompletu”.
Leão XIV subliña katak “Igreja no mundu nia moris bele komprende de’it liuhosi jerasaun sira nia susesaun. Tanba ne’e, hakuak ema katuas ida, ajuda ita atu komprende katak istória la’ós hotu iha prezente, no mós iha enkontru sira ne’ebé la’o lalais no relasaun fragmentáriu sira, maibé nakloke ba futuru.” Hateten Amu Papa Leão XIV iha Vaticano, 10/07/2025. Sita Vatican News
Papa Leão hatutan, “Dala hira maka ita-nia avó sira sai ezemplu ida fiar nian no devosaun nian, virtude sívika sira nian no kompromisu sosiál, memória no perseveransa nian iha provasaun sira”.
“Ita-nia gratidaun no konsisténsia sei la to’o atu espresa ita-nia agradesimentu ba legadu furak ida-ne’e ne’ebé husik hela mai ita ho esperansa no domin barak tebes”, Amu-Papa subliña.
Ninia konvite maka ba parókia ida-idak, asosiasaun, ka grupu igreja nian atu hala’o “revolusaun” gratidaun no kuidadu nian liuhosi vizita beibeik ba katuas-ferik sira, hodi kria rede sira apoiu no orasaun nian ba sira.
“Vizita ema ferik no katuas sira hanesan dalan ida atu hasoru Jezús ne’ebé liberta ita hosi indiferensa no solidaun.”
Parabéns ba ferik no katuas sira, koragem ba sira ne’ebe lakon ona ninia avó sira, orgullu ba sira ne’ebe sei iha avó, kuidadu no tau matan didiak ba idozu sira.