Luro Ne’ebe Halerik Ba Estrada, Iha Governu Nia Matan
SAPNewsTL, Lautém : Relasiona ho udan boot ne’ebe akontese iha Postu Administrativu Luro munisipiu Lautem, iha ne’ebe halo estrada hetok sai aat no superkrítiku, rezulta karreta truck ida baku fila tanba rai namdoras.
Tuir informasaun ne’ebe SAPNewsTL asesu iha lokal akontesimentu informa katak karreta refere tula semente husi Dili Ba Suku Lakawa mak sofre asidente iha iha Suku Afabubo tanba kauza husi estrada ne’ebe aat no superkrítiku.
Karreta refere sofre asidente, wainhira tula semente halai sa’e subida mak ho kauza husi rai namdoras, ikus mai karreta halai ba kotuk no kondutor la konsege kontrola nia travaun, entaun sofre asidente.
Asidente ne’e akontese orseik, loron 13 fulan marsu, iha area suku Afabubo, postu Luro munisipiu Lautém, portantu asidente refere la rezulta ema kanek no mate.
Kondisaun estrada iha area refere sofre deslizamentu rai, rai monu no mota sobu durante ne’e. Daudaun ne’e iha kompanha ida mak halo hela gabiaun (moru protesaun) hodi asegura estrada ne’e maibe tanba ho kondisaun udan, kompanha refere mos seidauk kontinua obra refere.
Antes ne’e, iha intervista ho Administrador foun Postu Administratvu Luro, Gaspar Xavier informa nia parte sei haree no rekomenda ba ministeriu relevante hodi solusiona problema estrada ne’ebe kleur tebes ona maibe sei kontinua aat.
“Ha’u foin asume kargu ne’e iha loron hirak liu ba, maibe relasiona ho estrada ne’ebe aat, ha’u nia parte sei haree, oinsa bele rekomenda ba Ministériu Obras Públikas hodi solusiona iha futuru”. Tenik Administrador Luro Gaspar Xavier ba SAPNews iha nia knar fatin, 12/03/2024
Estrada diresaun postu administrativu Luro, munisipiu Lautém ne’e ho distánsia kilómetru 8 mak oras ne’e daudaun sei kontinua aat tanba governu seidauk tau iha prioridade oesamental tinan .
Jornalista : Luis Pailofo