Manan Medalla, Governu Seidauk Bele Fo Prémiu Apresiasaun Iha 2023

SAPNewsTL, Dili: Governu liu husi Ministériu Juventude Desportu Arte Cultura (MJDAC) seidauk bele fo prémiu apresiasaun ba atleta Paralímpiku sira mak manan medalla iha Sea Para Games iha Indonesia no Cambodia.

“Ita nia Atleta paralimpiku sira manan medalla iha Sea Para Games iha Solo, Indonesia no Cambodia iha tinan anterior to’o agora seidauk hetan direitu, ne’e mak problema iha governasaun ita nian, agora ita seidauk iha komisaun nasional desportu foun iha MJDAC tan ne’e Iha tinan ne’e atleta paralimpiku sira seidauk bele hetan premiu apresiasaun, ministeriu sei tau iha orsamentu anual 2024 hodi atribui premiu sira ne’e ba atleta paralimpiku sira”, dehan Ministru Juventude Desportu Arte Kultura Nelio Izaac Sarmento ba jornalista sira iha salaun otel Vila Verde, Dili segunda (28/08/2023).

Ministru hatutan, Iha governu anterior halo ona mudansa ba dekretu lei ba komisaun nasional desportu tan ne’e atu kria fali komisaun nasional desportu ne’e tenki iha membru foun fali

Nune’e daudaun ne’e governu anterior la nomeia membru foun, tan ne’e nia mak tenki nomeia membru foun fali para kria komisaun nasional desportu foun atu sira bele halo servisu no halo desizaun ba direitu atleta paralimpiku sira ne’ebe hetan ona prestasaun lori medalla mai Timor-Leste iha Sea Para Games Indonesia no Cambodia

Tuir lolos governu anterior prepara ona para agora governu foun mai entrega deit ona premiu apresiasaun ba atleta paralimpiku sira.

Nia informa, loron hira liu ba nia foin nomeia membru foun komisaun nasional desportu tuir kompetensia ministru nian bazeia lei, tan ne’e nia nomeia ona membru foun sira nain haat no husi CPNTL rasik seidauk tanba sira seidauk iha Prezidente Foun

Bainhira membru komisaun nasional desportu foun iha ona, ba dahuluk sira tenki halo reuniaun depois tomada pose, ajenda ida mak koalia atribuisaun premiu apresiasaun ba atleta paralimpiku nia prestasaun iha tinan anterior

Tan ne’e nia husu ba atleta paralimpiku sira Pasiénsia oituan, agora foku halo preparasaun ba Asian Para Games iha Hangzhou, China tinan ne’e depois sira komisaun nasional desportu sei fo prémiu apresiasaun dala ida deit.

Iha fatin hanesan, Sekretariu Jerál CPNTL José da Silva Monteiro hatete, kona ba atleta sira nia direitu ne’e bainhira governu dehan sei prosesa, sira hein deit bainhira governu informa buat hotu los ona mak hato’o ba atleta sira.

“Kona ba ami atleta sira nia direitu ba prestasaun lori medalla mai Timor-Leste iha Sea Para Games Indonesia no Cambodia ne’e ita governu dehan sei prosesa ne’ebe ami tenki hein depois ami fo hanoin ba atleta sira hamutuk ho treinador sira katak buat hotu liu husi prosesu, nune’e bainhira governu informa ba buat hotu los atu fo ona premiu ba atleta sira mak ami informa fali ba sira”, tenik Jose

Estrutura atual CPNTL ho federasaun sira tur hamutuk deside halo kongresu ba hili Prezidente foun tanba Presidente mak bele sai membru ba komisaun nasional desportu tuir lei

Daudaun ne’e CPNTL la iha prezidente maibe sira sei halo uluk kongresu husi federasaun sira hafoin ba halo kongresu hili Prezidente CPNTL foun.

Entretantu, prestasaun atleta paralimpiku sira hatudu ona mak iha Sea Para Games iha Indonesia atleta sira hetan medalla osan mean lima, osan mutin rua no osan metan lima hamutuk medalla 12

Sea Para Games iha Cambodia atleta sira hetan medalla osan mean rua no osan metan lima hamutuk medalla hitu mak atleta paralimpiku sira lori mai ona Timor-Leste.

Reportajen: Augusto dos Santos