Nelio Izaac: Manny Pacquião Kansela Viajen Mai TL Iha 2023
SAPNewsTL, Dili: Ministru Juventude Desportu Arte Kultura Nelio Izaac Sarmento informa, boxista lejendariu husi Filipina Manny Pacquião seidauk bele mai vizita Timor-Leste iha fulan setembru 2023 tanba nia okupadu servisu.
“Horseik Ha’u ko’alia ona ho Manny Pacquião kona nia atu mai Timor-Leste iha fulan setembru ne’e maibe tanba nia ajenda barak los nia sei ba iha Dubai depois ba Europa, ba fali tan America”.
“Tan ne’e iha fulan setembru nia ajenda barak hela, nia folga oituan iha loron 29 ho 30 fulan setembru tan ne’e nia labele mai tanba ita nia atleta sira mos sei ba partisipa Asian Games iha sidade Hangzhou, China”, dehan Ministru Juventude Desportu Arte Kultura Nelio Izaac Sarmento ba jornalista sira iha salaun otel Vila Verde, Dili segunda (28/08/2028).
Ministru hatutan, nia mos informa ona ba Prezidente Federasaun boxing atu sira halo planu foun ba konvida Manny Pacquião mai Timor-Leste iha fulan maiu 2024 tanba iha fulan setembru tinan ne’e Manny Pacquião seidauk bele mai vizita Timor-Leste tanba nia okupadu los ho nia servisu
Iha Filipina Boxista Lejendáriu Manny Pacquião laos de’it hanesan boxista maibe nia nu’udar mos senator ba nia nasaun tan ne’e tenki komprende nia situasaun ida ne’e.
Entretantu, antes ne’e Ministru Juventude Desportu Arte Kultura Nelio Izaac Sarmento informa ona ba públiku katak nia kolega diak ho Manny Pacquião tan ne’e nia atu konvida boxista lejendariu Manny Pacquião mai Timor-Leste iha fulan setembru tinan ne’e
Nia mai atu fahe nia esperensia sai boxista famozu iha mundu ba boxista sira iha Timor-Leste no hari’i Pacquião training camp iha Timor-Leste atu dezenvolve modalidade boxing iha rai ne’e tanba hanesan modalidade potensial tebes ba atleta sira iha Timor-Leste hetan prestasaun iha futuru.
Reportajen : Augusto dos Santos