Refleta Tinan 24 Konsulta Popular, KEUL Husu Dignifika Istória Ho Paz & Dezenvolvimentu
SAPNewsTL, Dili : Ohin Loron 30 Agustu 2023, Repúblika Demokrátika Timor-Leste (RDTL) Komemora Loron Konsulta Popular ba dala 24, Loron 30 Fulan Agustu 1999 nu’udar loron determinante no istóriku ne’ebe povu Timor Leste deside no hili ninia liberdade liu husi referendum ne’ebe hamosu Pro Independênsia no pro integrasaun
Iha intervista ho Sekretariu Ezekutivu KEUL Calistro Horácio dos Santos “Lito Sure” hateten, Loron Konsulta Popular 30 Agustu 1999 hanesan loron ne’ebe povu atravessa konjuntura polítika hodi deside dalan ba ukun rasik an no pro-otonomia
“Husi opsaun rua ne’e povu maioria hili absolutamente ukun rasik an ho 78,5%, Nune’e iha 1999 to’o 2002 Timor Leste nu’udar estadu tranzisaun husi Misaun Organisaun Nasaun Unidas (ONU) iha Timor mak administra durante tinan 3, hafoin Timor Leste Restaura nia independênsia iha loron 20 Maiu 2002”. Tenik Sekretariu Ezekutivu Klibur Estudante Universitáriu Luro (KEUL) ba SAPNewsTL iha Dili, 30/08/2023
Sekretariu Jerál KEUL ne’e hatutan, Loron Konsulta Popular fo reflesaun ba Timor oan hotu katak desizaun ba Libertasaun Povu mak sai alvu prinsipal iha kontextu ukun rasik an tanba ne’e entidade hotu hotu tenki unifika forsa hodi hasoru inimigu kiak no mukit ne’ebe sei buras iha sosiedade
“Entidade Guvernu no NGO sira hotu tenki unifika forsa hodi hasoru inimigu boot kiak no mukit iha Timor Leste, inimigu Uluk mak regime ditadura no inimigu agora mak kiak no beik tanba ukun an nia alvu prinsipal mak moris Diak no liberdade ba ema hotu”. Lito Sure Subliña
Lider KEUL-Lautém ne’e mos husu ema hotu liliu joven sira hodi sai ajente transformador no kontrolu sosial ne’ebe bele asegura paz no estabilidade iha komunidade nia leet
“Lori KEUL nia naran hato’o parabéns ba povu doben Timor Leste ne’ebe ohin Komemora Loron Konsulta Popular ba dala 24 no refleta ba funu durante tinan 24 ne’ebe nakonu ho terus no injustiça, ohin loron ita tenki garante paz no estabilidade ba sidadaun hotu hodi sai ajente transformador no mudansa ba sosiedade”. Nia hatete
Nia fundamenta, atu valoriza no dignifika Historia mak Timor oan hotu Persija konsentra ba dezenvolvimentu husi aspeitu Sosial, Politika, Edukasaun, Ekonomia, Saude, Agrikultura, no Desportu inklui setor vital sira seluk
Jornalista : Marcela Mesquita Lemos