Mateus Eleitu Ba Prezidente FTCATL, MJDAC Husu Halo Programa Di’ak

SAPNewsTL, Dili – Mateus Da Cruz eleitu ba Prezidente Federação Tiro Com Arco De Timor-Leste (FTCATL) iha asembleia jeral ordinariu, Ministru Juventude Desportu Arte Kultura (sigla portuges MJDAC) Nelyo Isaac Sarmento husu halo programa diak nune’e hamosu atleta sira ho kualidade.

“Asembleia jerál ohin ne’e extraordinariu tanba federasaun ne’e hari’i dezde 2015 no rejistadu ona iha organizasaun internasionál, tan ne’e asembleia ne’e ita halo reestruturasaun ba federasaun nian hodi kompleta estrutura federasaun nian”, dehan prezidente eleitu FTCATL Mateus da Cruz ba jornalista sira iha salaun JL Vila Fatuhada, Dili sabadu (01/06/2024).

Prezidente eleitu hatutan, sira iha planu ona sei koalia ho governu ba oin oinsa, sira mos sei aumenta ekipamentu balun maski ekipa iha ona, sira mos sei halo uluk formasaun ba treinador sira hodi husu ba federasaun Azia para haruka ema mai fo formasaun depois remata formasaun, sira sei halo preparasaun ba atleta sira.

Iha fatin hanesan, Ministru juventude desportu arte kultura Nelyo Isaac Sarmento hatete, ohin kongresu dahuluk ba Federasaun Rama Hana Timor-Leste tanba federasaun eziste iha tinan lubuk ida, nune’e ohin sira fortifika estrutura organizasaun, hein katak sira iha programa diak hodi nune’e oinsa atu introdus modalidade ne’e ba povu Timor-Leste liuliu hahu husi eskola sira no kria kompetisaun hamosu atleta foun sira ho kualidade.

“Ohin kongresu dahuluk ba Federasaun Rama Hana Timor-Leste tanba federasaun eziste iha tinan lubuk ida, nune’e ohin sira fortifika estrutura organizasaun para sai hanesan federasaun, federasaun ne’e kleur ona eziste iha Timor-Leste, hola parte iha jogu olimpiku maibe iha Timor-Leste seidauk iha atleta ba modalidade rama hana, federasaun reestrutura organizasaun, ita hein katak sira iha programa diak, oinsa atu introdus modalidade ne’e ba povu Timor-Leste liuliu hahu husi eskola sira no kria kompetisaun hamosu atleta sira”, tenik Nelyo

Ministru salienta tan, modalidade ne’e nia nivel karun oituan ba povu Timor-Leste tanba sira nia ekipamentu sira ne’e folin karun maibe federasaun ne’e organiza didiak governu iha obrigasaun fo apoiu tomak.

Entertantu, estrutura foun ba FTCATL mak prezidente Mateus da Cruz, vice prezidente 1 Augusto dos Santos Marques, vice prezidente 2 Brigida Antonia Correia, vice prezidente 3 Hipolito Da Costa, vice prezidente 4 Fabiola de Lurdes Cadalurva, sekretariu jeral Guilhermino da Cruz, vise sekretariu jeral Mateus de Jesus Gomes, tezoreira Yuliati Brito, konsellu dixiplina João Americo, Konsellu Arbitrajen Luis Tavares.

Reportajen: Augusto dos Santos