MD-CPLP Rekunhese TL Reforsa Estabilidade Rejional & Kapasitasaun Institusional
Imajem: Delegasaun Ministru Defeza hosi Estadu membru Comunidade dos Países de Língua Portuguesa hamutuk ho Primeiru-Ministru Kay Rala Xanana Gusmão iha Palasiu Guvernu, 03/06/2026. Foto: Media PM
SAPNewsTL, Dili : Delegasaun Ministru Defeza hosi Estadu membru Comunidade dos Países de Língua Portuguesa (CPLP) aprezenta realizasaun XXV Reuniaun Nível Ministru Defeza CPLP ba Primeiru-Ministru Kay Rala Xanana Gusmão hafoin remata reuniaun iha Dili.
Delegasaun Ministru Defeza hosi Estadu membru CPLP espresa sentidu agradesimentu bá Timor-Leste tanba akollimentu no ospitalidade durante realizasaun XXV Reuniaun Nível Ministru Defeza CPLP iha Dili. Konsidera organizasaun enkontru ne’e la‘o ho susesu no reforsa espíritu kooperasaun entre estadu membru sira.
“Ami mai atu hato’o ami-nia saudasaun bá Primeiru-Ministru, Kay Rala Xanana Gusmão no agradese bá akollimentu durante reuniaun iha Dili”. Dehan Ministru Defeza Nasionál, Antigu Kombatentes no Veteranu da Pátria Angola General Lúcio Gonçalves Amaral iha enkontru ho Primeiru-Ministru, Kay Rala Xanana Gusmão, iha Palásiu Governu, kuarta 03/06/2026.
Realizasaun XXV Reuniaun Nível Ministru Defeza CPLP iha Timor-Leste hatudu kompromisu estadu membru sira iha promosaun diálogu, solidariedade, dezenvolvimentu kapasidade forsa armada no kooperasaun iha área defeza no seguransa.
Durante enkontru ne’e, Ministru sira mós rekoñese esforsu Timor-Leste iha reforsa estabilidade rejionál, kapasitasaun institusionál no partilla koñesimentu entre Estadu membru CPLP sira.
Delegasaun sira aprezenta mós bá Primeiru-Ministru rezultadu diskusaun sira iha reuniaun Ministru Defeza Nasionál CPLP, inklui analiza kestaun internasionál ho implikasaun polítika-militár iha kontestu rejionál, aprova no ratifikasaun dokumentu estratéjiku sira CPLP nian, apresiasaun bá relatóriu anuál, no diskusaun kona-bá kalendáriu atividade futuru.
Reuniaun ne’e partisipa hosi Ministru Defeza Nasionál Angola, General Lúcio Gonçalves Amaral; reprezentante Ministru Defeza Brasil, General de Exército Alcio Alves Almeida e Costa; Ministru Defeza Moçambique, Cristóvão Artur Chume; Sekretáriu Estadu Adjuntu Polítika Defeza Nasionál Portugal, Nuno Pinheiro Torres; Ministru Defeza São Tomé e Príncipe, Horácio Castro da Trindade de Sousa; Sekretária Ezekutiva CPLP, Embaixadora Maria de Fátima Jardim; Diretór Centro de Análise Estratégica da CPLP, Capitão de Mar e Guerra João Carlos Pires, no delegasaun Estadu membru sira seluk.
Reuniaun XXV ne’e realiza iha ambitu Prezidénsia Pro-Tempore Timor-Leste nian iha CPLP, ne’ebé kontinua reforsa kooperasaun multilaterál iha área defeza no seguransa entre nasaun sira ne’ebé ko‘alia Lían Portugés.
