ME Sei Foku Ba Hadia Kualidade Professór & Edukasaun

SAPNewsTL, Dili: Hafoin hala’o reunião hamutuk kona ba planeamentu ministériu Edukasaun ba tinan letivu 2024, Ministra Edukasaun Dulce Maria de Jesus haktuir Ministériu Edukasaun sei foku ba hadia kualidade edukasaun no kualidade programa.

 

Sorumutu ne’e kona ba planeamentu ministériu edukasaun ba tinan 2024, reunião ne’e ko’alia kona ba jornada orsamental 2024 hodi enkaixa ba programa guvernu dasia

 

“Ohin ko’alia kona-ba ba jornada orsamental 2024 nian no planu ba programa durante tinan 5 nian, programa hirak ne’e haree ba eskola ensinu primáriu, ensinu báziku, ensinu sekundária jerál no ensinu tékniku vokasional ne’ebe liga liu ba sistema, kurrikulum, avaliasaun, materiais didátikus, formasaun ba professores tanba wainhira ko’alia kualidade edukasaun professor sira parte ida importante tebes”. Tenik Ministra Edukasaun Dulce Maria de Jesus ba Jornalista sira iha Salaun Delta Nova, kinta(14/09/23)

 

Dulce akresenta, Nonu Guvernu Konstitusional sei forma asaun konzunta ministériu edukasaun ne’ebe sei halibur parseiru sira ne’ebé iha interese ba dezenvolve setor edukasaun hodi hadia no hasa’e kualidade edukasaun iha Timor Leste

“Ami sei forma asaun konzunta ida hodi halibur parseiru sira ne’ebé iha interese ba dezenvolve setor edukasaun hodi haree no hadia edukasaun, ami sei haree liu ba kualidade edukasaun no kualidade programa, laos montante osan mak sai indikador maibe enfaze ba programa kualidade”. Nia subliña

Iha parte seluk, Governante ne’e informa sei enkaixa edukasaun seksualidade ba kurikulum edukasaun hodi hanorin estudante sira tanba edukasaun seksualidade iha ona programa nonu guvernu konstitusional

“Edukasaun seksual enkaixa iha polítika IX governu atu sai kurikulum hanorin iha eskola maibe, kurikulum nasional de base iha ona materia ne’ebe mak atu ko’alia kona-ba laiha tolerânsia violênsia bazeia ba jeneru, hanorin buat barak ne’ebe maka halo labarik sira kompriende kona ba nia isin oinsa atu proteje nia an oinsa mak moris iha vida sosial”. Nia dehan

Ministra Fundamenta, Edukasaun seksual materia ida ne’ebé nia integradu iha materia sira seluk hanesan hanorin etika ba labarik ida mos halo labarik bele hatene respeitu malu, kuidadu nia isin lolon liliu ba ensinu báziku, oinsa bele respeita nafatin kultura maibe hanorin labarik sira atu komprende respeita sira nia an rasik

Jornalista: Ermelinda Soares