Menuz Fasilidade, Estudante no Dosente Fakuldade Ekonomia UNTL Halo Protestu Hasoru Reitor
Dili,: Estudante no Dosente Universidade Nasional Timor Lorosa’e, Faculdade Economia e Gestão, Departamento Ciência e Economia halo protestu hasoru Estrutura Reitoria UNTL tanba menus fasilidade ba ensinu aprendizajem
Tuir estudante Faculdade Economia e Gestão, Departemento Ciência Economia; Rosalia Soares de Almeida hateten, husi dader kedas ami iha ona fatin ne’e halo demostrasaun hasoru Reitor sira hodi ezize ami nia direitu hodi hetan fasilidade ne’ebé ami presiza maibé até agora seida’uk hetan responde ruma husi Reitor.
“Ami Senti triste tebes tamba sira hatene hari’i edifisiu bo’ot maibé la iha fasilidade, ami menus buat barak hanesan kadeira, meza, espidol no prozetor; ida ne’e difisil mai ami atu hala’o ami nia prosesu aprendizajem iha aula laran” Dehan Rosalia Soares ba Jornalista Sapnewstl iha UNTL, Segunda-Feira, 16-05-2022.
Iha fatin hanesan Dosente UNTL, Faculdade Economia e Gestão, Departamento Ciência Economia; Professor Silvino Augosto Pinto Cabral hatutan tan: kada tinan numeru estudante sira iha Timor laran ne’e obriga tama hotu iha UNTL liu husi meius oioin, maibé la prepara fasilidade no fasilidade la to’o ne’e sai kestaun bo’ot ida mai ami.
“Aula laran de’it ema lubun maibé menus fasilidade,mak hanesan la iha kadeira, la iha espidol, la iha Leptop no prozetor mos la iha, ida ne’e sai problema bo’ot mai ami, Tamba UNTL ne’e forma ema atu sai matenek, maibé kuandu ita la utiliza tempu ne’ebé di’ak no hanorin didi’ak estudante sira, ida ne’e halo ona diskriminasaun ba estudante sira. Tamba sira mai buka matenek maibé fasilidade la to’o ba sira atu aproveita prosesu aprendizajem” Tenik nia.
Dosente ne’e hatutan : Faculdade Economia iha inisiativa hato’o ba UNTL atu nune’e bele buka solusaun ba iha problema ne’e hodi bele rezolve lalais, situasaun ne’e la bele husik de’it,tamba UNTL ne’e universidade públiku,maibé la iha fasilidade to’o agora desde tinan ruanulu resin ona maibé la iha fasilidade ida atu utiliza hodi hasa’e kualidade iha UNTL nia laran.
“Ohin ami husi Ciência Economia tomak,no ha’u nu’udar Dosente ha’u mak suporta sira mai tamba ho hanoin ida katak situasaun ne’e mak ita la ko’alia ne’e sei la hetan nia solusaun no Timor oan sira ne’ebé mak aprende kona ba ekonomia la aprende ho di’ak tamba de’it menus fasilidade, tur de’it iha rai,no aula ida ema kuaze Hitu-nulu (70) kedas mak iha aula laran” Akresenta nia.
Entretantu Nia mos hatutan tan; UNTL tenke fokus hodi rezolve lalais problema ne’e, UNTL la bele fokus fali ba problema iha liur nia, tamba ne’e ha’u hanesan dosente ha’u hamrik iha klaran,ha’u hamrik iha oin,hamrik mos iha kotuk atu bele suporta, fo hanoin ba estudante sira katak buat ne’ebé mak imi ezize ne’e imi nia Direitu. Ukun an ona ne’e para atu goza, atu estuda, fasilidade tenke iha atu nune’e bele lori nasaun ne’e ba oin. Hakotu nia.
Jornalista : Conzita Mota
Editor :Natalino da Silva