Militante Husi KHUNTO & PD Afilia Ba CNRT, Xanana Apresia Ba Inisitiva Di’ak Husi Feto Sira
Imajem: Primeiru-Ministru Kay Rala Xanana Gusmão hamutuk ho afiliada sira husi partidu KHUNTO no PD iha Ailok-Laran, 30/05/2026. Foto: SAPNewsTL
SAPNewsTL, Dili : Presidente Partidu CNRT, Kay Rala Xanana Gusmão simu afiliada sira hosi Partidu Kmanek Haburas Unidade Nasionál Timor Oan (KHUNTO) no Partidu Demokrátiku (PD), Xanana haktuir movimentu feto ne’ebé hari’i iha Ailok-Laran mak “inisiativa ida ne’ebé diak tebes no presiza apoiu atu bele kontinua dezenvolve ba futuru”.
Ermelinda Soares – SAP News Agency
Prezidente Partidu CNRT ne’e husu ba feto sira atu la to’o de’it partisipa iha movimentu, maibé mos tenke iha planu ne’ebé forte no klaru hodi hametin organizasaun husi tinan ba tinan.
“Movimentu feto tenke sai meius ida atu hasa’e partisipasaun feto sira iha prosesu dezenvolvimentu nasionál. Membru sira tenke servisu makás no servisu nafatin, tanba governu iha kompromisu atu lori dezenvolvimentu ba povu, la’os tanba interese polítika de’it mak ema sira partisipa, maibé tanba iha sentidu atu kontribui ba dezenvolvimentu rai ne’e nian”. Hateten Presidente Partidu CNRT Kay Rala Xanana Gusmão iha Ailok-Laran, 30/05/2026
Xanana Gusmão hatete durante tinan 24 independénsia, povu iha Ailok-Laran komesa sente ona benefísiu hosi dezenvolvimentu ne’ebé realiza ona. Movimentu ida ne’e inisiativa importante hodi garante kontinuidade no kooperasaun entre komunidade sira.
“Apresia ema sira ne’ebé mai hosi partidu polítiku seluk no partisipa iha movimentu ne’e, apresiasaun ne’e la’os tanba interese atu hetan kargu polítiku, maibé tanba sira-nia pensamentu no kontribuisaun ba dezenvolvimentu nasaun nian”. Nia sublinha
Prezidente Partidu mais votadu ne’e enkoraja movimentu feto iha Ailok-Laran atu kontinua fortalese nia estrutura no programa sira hodi bele kontribui liutan ba dezenvolvimentu komunidade no nasaun Timor-Leste.
Reprezentante Movimento Mulher Politika (MMP-CNRT) Tereza Gonsalves deklara afiliasaun ba Partidu CNRT no kompromete atu fortalese lideransa feto no apoia Xanana Gusmão nia lideransa ba desenvolvimentu nasionál.
“Maioria membru MMP ne’e mai husi Partidu KHUNTO, afiliasaun ba CNRT bazeia ba vizaun no misaun dezenvolvimentu sustentável ba povu no nasaun. Movimentu ne’e harii husi inisiativa feto sira rasik. Hafoin prosesu diskusaun no organiza asaun durante fulan ida, movimentu ne’e deside halo afiliasaun ba Partido CNRT hodi fo konfiansa no apoiu ba lideransa Kay Rala Xanana Gusmão.
“Movimentu ne’e komesa ho grupu feto sira ne’ebé mai hamutuk atu diskute no halo planu kona-ba oinsá hasa’e partisipasaun feto iha área polítika, ekonomia, edukasaun no dezenvolvimentu komunidade”.
Nia esplika maioria estrutura no membru MMP-CNRT mai husi Partidu KHUNTO no mos husi partidu polítiku seluk. Hafoin membru sira hamutuk no deside halo afiliasaun ba Partido CNRT tanba haree katak partidu ne’e iha vizaun no misaun ne’ebé fó prioridade ba dezenvolvimentu sustentável no bem-estar povu nian.
MMP-CNRT konsidera programa governu lidera husi Primeiru Ministru Kay Rala Xanana Gusmão iha Nonu Governu Konstitusionál hanesan ezemplu ida ba dezenvolvimentu iha setor importante sira hanesan bee-mos, eletrisidade, estrada no ponte husi nivel nasionál to’o munisípiu, suku no aldeia.
Terezina deklara feto iha direitu atu partisipa ativamente iha vida demokrátika no fó kontribuisaun ba dezenvolvimentu nasaun nian. Tanba ne’e, MMP-CNRT promove lideransa feto, inkluzaun ekonomika, edukasaun no protesaun hasoru violénsia bazeia ba jéneru.
Aleinde atividade polítika, movimentu ne’e mos hala’o ona atividade sosial no karidade hanesan fahe ai-han ba inan-faluk no ema ho defisiénsia sira. Orsamentu ba atividade hirak ne’e mai husi kontribuisaun membru sira rasik iha laran movimentu.
Atu prepara rekursu umanu feto sira ba futuru, MMP-CNRT mos komesa organiza no haruka membru sira tuir formasaun no kursu oioin, inklui kursu komputador, lian Inglez, lian Koreanu, lian Portugés no lian Japonez. Programa hirak ne’e hakarak aumenta kapasidade no profesionalizmu membru sira atu bele kompete iha merkadu servisu.
MMP-CNRT reafirma nia kompromisu atu kontinua servisu ba fortalese lideransa feto no prepara rekursu umanu feto sira hodi kontribui ba dezenvolvimentu nasionál. Movimentu ne’e mos kontinua defende unidade, partisipasaun no oportunidade igual ba feto hotu-hotu iha Timor-Leste.
