Momentu Emosionante, Simu Pe. Maubere Ho Matan-Ween & Ai-Funan
Imajem : Sarani Parokia Sagrado Coração de Jesus Becora tanis no simu Kadáver Padre Domingos Maubere, Dili, 17/05/2025. Foto : Marciana Da Conceição
SAPNewsTL, Dili : Wainhira Kadáver Saudozu Padre Domingos da Silva Soares “Maubere” nia isin mate to’o Bekora, Sarani SACROJES Bekora ho laran-susar no matan-ween tanba sente lakon aman diak, figura no bibi atan ne’ebe fo an tomak ba servi durante sei moris.
Wainhira Kadáver Padre Domingos Maubere to’o Kuluhun, sarani sira kari ai-funan, tanis no halai tuir karreta funerária nakonu ho triste no matan-ween.
Jornalista SAP News TL observa katak ferik no katuas barak hamonu matan-ween, labarik, jovens no adultu sira kari ai-funan hodi fo omenajem ba Padre Domingos Maubere.
Lembra fali, wainhira iha dalan sarani sira hamrik, halo sinal da cruz, fo kontinénsia no omenajem ba Kadáver Padre Domingos da Silva Soares Maubere nakonu ho laran taridu resin no emosionante.
Wainhira Karreta Funerária ne’ebe translada Saudozu Padre Domingos Maubere Hakat husi dalan, sarani sira ne’ebe hamrik iha luron hamonu matan-ween no kari ai-funan nu’udar símbolu domin, agradesimentu no despedida ba maktoban.
Imajem : Dom Virgílio Cardeal do Carmo da Silva no Ministra Saúde Elia Amaral
Saudozu Padre Domingos Maubere nia mate-isin to’o Aeroporto Internacional Nicolau Lobato Comoro no simu direta hosi Sua Eminiénsia Dom Virgílio Cardeal do Carmo da Silva hamutuk ho padres, madres, sarani no Ministra Saúde Elia A. A dos Reis.
Hafoin simu, ema hotu ne’ebe presente iha Aeroporto Comoro, kontinua translada ba Parokia Sagrado Coração de Jesus Becora hodi halo orasaun no misa husi sarani Parokia SACREJES Becora.
Durante estadia Kadáver Padre Domingos Maubere, sarani sira halo orasaun, venerasaun no misa ba Saudozu durante loron ida no kalan ida iha Letefoho, 16-17 Maiu 2025.
Wainhira misa remata, sarani Letefoho-Ermera ho laran triste no matan-ween hodi akompaña Saudozu nia mate-isin ba fatin ne’ebe elikópteru para ba hodi translada ba Dili.
Wainhira elikópteru to’o Letefoho, sarani sira ho laran susar no matan-ween nakonu hodi foti liman.
Tuir programa, hafoin Mate-isin Saudozu Padre Domingos Maubere translada ba rai moris fatin, Postu Administrativu Letefoho Munisípiu Ermera, kalan ida iha Letefoho, sei lori hikas mai Parokia Sagrado Coração de Jesus Beroka iha tuku 13:00, loron 17 Maiu.
Tuir mai, igreja sei halo misa fúnebre iha Igreja Sé Catedral, Villa Verde Díli, iha tuku 10:00, loron 19 Maiu 2025, hafoin sei halot Padre Domingos Maubere iha Semitériu Ailok-Laran Díli.
Jornalista : Marciana Da Conceição