Mundu Akadémiku Ne’ebe Desafiante ! Tarde Sim, Susesu Tenki

SAPNewsTL, Dili : Presidente Assosiação Akadémica Estudantil FEST UNTL Sergio Alves da Costa konsidera tama Universidade Nacional Timor Lorosa’e ne’e tama iha mundu luta nian & mundu konkista nian, tanba susesu ne’e prosesu ida ne’ebe konkista liu husi luta, dedikasaun no prestasaun.

Presidente Assosiasaun, Sergio Alves da Costa saran lia hirak ne’e, wainhira hala’o apresentasaun kona ba Papel Assosiasaun Akadémika Estudantil FEST-UNTL iha auditorium kampus UNTL hera, loron 08 Marsu 2024.

“Dalan tama mai UNTL ne’e liu husi odamatan klot ne’ebe difisil maibe imi nain atus haat ruanulu (420), bele hakat liliu bele tama mai iha kuartu fakuldade engenharia siensia no teknolojia (FEST), ohin imi hotu sente haksolok maibe imi hotu tenki esforsu, dixiplina, badinas, estuda didiak tanba atu hetan susesu ne’e konkista ida ne’ebe liu husi dedikasaun, sakrifisiu no prestasaun diak”. Tenik Sergio Alves da Costa

“Tama iha UNTL, ita tama iha mundu akadémiku, mundu ne’ebe nakonu ho dejafiu no teste oioin, mundu ne’e ezije ita nia aten brani, boa vontade, komitmentu, laran metin no hakaas an hodi enfrenta dejafiu sira ne’ebe nu’udar dalan hodi to’o iha odamatan klot susesu nian, tanba durante ne’e ema barak mak mai, maibe to’o ikus ema uituan mak hotu, barak rende ka abandona iha dalan klaran, bele tarde, maibe susesu ne’e tenki”.

Sergio Alves da Costa hateten, Fakuldade Engenharia Siénsia no Teknolojia hanesan fakuldade ne’ebe úniku, ezemplar no diferente iha UNTL, fakuldade ne’ebe dizitalizadu, modernizadu no sivilizadu liu iha UNTL tanba ne’e esperansa boot ida ba estudante foun sira hodi adapta an no uza espasu murak ne’e hodi fo susesu ba kursu ida idak nian.

“FEST ne’ebe dizitalizadu, modernizadu no sivilizadu iha UNTL, imi tenki koko adapta an ho lais, uza tempu no espasu ne’e ho efetivu hodi fo susesu ba imi nia estudu, tanba inan aman sira hein hela ita nia susesu tanba, akontese dala barak iha inan aman, avó sira, tiun no tian sira, hein tebes oan nia susesu maibe tanba distinu mate mai, dala ruma seidauk haree oan ninia susesu, fila hikas ona ba aman maromak ninia kadunan santu”.

“Nune’e, ita estudante sira tenki hakaas an hodi estuda, estuda no estuda, ohin imi mai UNTL, ita mai asesu, aban ita hahú ho prosesu foun, luta ba susesu, ne’e difisil maibe laos impossivel, asesu para susesu mais keta haluha respeita prosesu naruk ne’ebe imi sei liu. wainhira ita gradua ka susesu, ita dignifika sira nia sakrifisiu no sira sei kontente tanba nianoan mane no feto ne’e bele hetan susesu ida.” Sergio Alves da Costa husu

Liga ba papel assosiasaun, Senadu Estudantil ne’e haktuir, Assosiasaun hanesan grupu ida ne’ebe hari’i husi estudante, iha ne’ebe hamrik hodi defende no garante direitu, dignidade no dezenvolvimentu estudante sira nian tuir regulamentu akadémiku.

“Assosiasaun estudantil ne’e hili direita husi estudante sira liu husi eleisaun ne’ebe livre no demokrátiku, grupu ne’e hamrik hodi tau matan no defende dezenvolvimentu estudante tuir regra sira no norma sira ne’ebe hatur iha UNTL”.

“La to’o deit iha ne’e, assosiasaun mos iha papel hodi hala’o atividade extra kurikulariu sira ne’ebe bele hodi dezenvolve no promove talentu no kunhesimentu estudante sira nian, entre sira ida maka agora daudaun prpgrama engenharia games (futsal, voleibol, futebol, arte no múzika, no koru), semináriu, workshop, formasaun no seluk tan ne’ebe balun la’o ona no balu sei iha faze realizasaun”. Nia informa

Estudante foun sira ne’ebe konsege registu no partisipa iha orientasaun akadémika ne’e hamutuk atus haat ruanulu (420), orientasaun ne’e durante loron haat (06-09), iha ne’ebe hahu ho gladi no remata ho agradesimentu.

Jornalista : Marcela Mery da Costa