Nelio Izaac konsidera Fulan Dezembru La Oportunu Realiza Liga Timorense
#
(SAP News TL) DILI- Eis Sekretariu Estadu Juventude Desportu (SEJD) Nelio Izaac konsidera fulan dezembru laos tempu oportunu realiza Liga Timorense epoka 2022-2023 tanba ne’e tama ba tempu udan no natal depois limitadu ba kampu tanba udan jogu dala tolu ka haat duut kampu mate hotu.
“Fulan dezembru la iha tempu oportunu para ita realiza Liga Timorense epoka 2022-2023, tan ne’e LFTL ho FFTL tenki haree ida fulan dezembru ne’e tama ba natal no tempu udan depois kampu mos limitadu Estadium Munisipal Dili deit bainhira semana ida jogu dala tolu ka haat kampu sai rai henek tanba duut sira mate hotu”, eis SEJD Nelio Izaac ba jornalista sira iha edifisiu partidu CNRT Bairro Formosa, Dili kuarta (30/11).
Eis sekretariu estadu akresenta, kondisaun insfraestrutura no tempu udan susar duni atu organiza liga, tan ne’e governu mos karik bele haree hamutuk ho orgaun rua ne’e para fo hanoin para Liga Timorense epoka 2022-2023 hala’o iha tinan oin ho orsamentu ne’ebe agora iha ona ne’e no ikus FFTL LFTL no governu tenki iha hanoin ida hodi realiza liga karik sira iha ideia ketak-ketak susar oituan atu hala’o liga ne’e.
Nia sujere Liga Timorense epoka 2022-2023 hala’o iha tinan oin tanba fulan dezembru tempu udan no kampu oituan maibe LFTL ho FFTL hala’o ema hotu satisfas selae liga sei la iha kualidade
“Ha’u sujere diak liu Liga Timorense epoka 2022-2023 ita halao iha tinan oin tanba hahu iha fulan dezembru ne’e susar tanba iha situasaun tempu udan ho kampu ne’ebe oituan ne’ebe ba joga iha munisipiu sira mos presiza kustu boot ne’ebe LFTL ho FFTL tenki hala’o liga, ita hotu liuliu klube sira satisfas selae liga sei la iha kualidade jogu”, tenik Nelio Izaac
Nelio Informa, agora FFTL, LFTL no SEJD mos tenki identifika problema nia hun tanba saida klube sira rezeita realiza Liga Timorense iha fulan dezembru ne’ebe klube sira nia kestaun mak finanseiru suportasaun no tempu ne’ebe sira tenki tetu kestaun ida ne’e antes hakat ba Liga Timorense 2022-2023 tanba ema hotu hakarak liga sustentavel katak kada tinan lao tuir tempu ne’ebe la rezolve tinan oin mos sei lao hanesan ne’e nafatin.
Eis sekretariu jeral FFTL hatutan, situasaun sira ne’e halo FFTl ho LFTL atu obriga an hala’o liga sei la hetan jogu no jogador kualidade mais pelu menus halo mudansa no sira mos halo orariu tenki haree orariu jogu internasional sira no tinan oin tama tinan politiku nian
“Situasaun sira ne’e FFTL ho LFTL atu obriga an hala’o liga ita sei la hetan jogu no jogador kualidade pelu menus halo mudansa ba jogador no jogu sira, LFTL ho FFTL mos tenki haree ba orariu jogu internasional sira maka hanesan jogu AFF U-14, U-16 no sira seluk para halo orariu liga epoka 2022-2023 tuir ida ne’e no tinan oin ita tama ba tinan politiku nian ne’ebe dala ruma ita sente buat hotu lao diak maibe too klaran mak problema akontese ita nia liga bele paradu tiha”, tenik eis SEJD
Reportajen : Augusto dos Santos