Papa Francisco : Buat Ne’ebé Furak Liu Iha Timor-Leste Maka Ninia Ema Sira

SAPNewsTL, Dili – Hafoin to’o Aeroportu Internasional Nicolau Lobato Comoro Díli, Santu Padre Papa Francisco ho laran ksolok no fo agradese ba Maromak tanba bele lori nia to’o rai ida ne’ebé dook tebes husi Vatikanu.

Iha serimónia resepsaun, iha Labarik Na’in 3 kompostu hosi feto na’in 2 no mane na’in 1 hodi representa kultura Timor-Leste simu Santu Padre Papa Francisco.

Iha aeroportu internasional Nicolau Lobato, Presidente Repúblika José Ramos Horta no Primeiru Ministru Kayrala Xanana Gusmão hamutuk ho membru governu sira simu Papa Francisco no hetan bensaun husi Santu Padre.

Husi Aeroportu Comoro, Papa Francisco hakat Mai dalan fo bensa ba sarani sira ne’ebé forma naruk husi resintu aeroportu to’o Nunsiatura Motael.

Hafoin deskansa iha Nunsiatura Motael, Papa Francisco kontinua ba Palasiu Presidensial Nicolau Lobato Dili hodi halo sorumutu ho Lider Polítiku no sivil sira.

Iha Palasiu Presidensial Nicolau Lobato, Santu Padre Papa Francisco sente ksolok no agradese ba Na’i Maromak tanba bele lori nia to’o Timor-Leste.

Papa Francisco enkoraja povu Timor-Leste atu moris ksolok iha fiar, armonia no diálogu tuir kultura Timor nian.

“Ha’u agradese ba Na’i tanba lori ha’u mai Timor-Leste no ha’u enkoraja ninia povu atu moris ksolok fiar nian, iha armonia no diálogu ho kultura”. Papa Francisco hakerek liu hosi karta ne’ebe prepara iha Palasiu Prezidensiál Nicolau Lobato Dili, 09/09/2024

Lider Mundial Igreja Katólika ne’e konsidera buat ne’ebe furak liu iha Timor-Leste maka ninia povu.

“Buat ne’ebé di’ak liu no furak liu ne’ebé Timor-Leste iha mak ninia ema sira. Ha’u haraik bensaun ba ita-boot ho ha’u nia fuan tomak.”

Enkuantu, bainhira Papa Francisco to’o aeroportu sarani sira simu tuir kultura Timor-Leste nian.