Papa : “Jesus Mak Esperansa, Keta Ta’uk, Fiar De’it”.
Imajem : Santu Padre Leão XIV iha Basílica São Pedro Vaticano, 25/06/2025. Foto : Vatican News
SAPNewsTL, Vatikanu : Durante audiénsia jerál, Amu-Papa Leão XIV reflete kona-ba milagre rua ne’ebé demonstra katak Na’i bele kura nafatin ita bainhira ita bá hasoru Nia iha konfiansa no fiar, tanba “Jezús mak ita-nia esperansa” no hafoun ita.
Marciana da Conceição – SAPNewsTL / Fonte – Vaticano News
“Moris iha momentu deziluzaun no dezenkorajamentu nian, iha mós esperiénsia mate nian. Mai ita aprende husi sira, mai ita bá hasoru Jesus: Nia bele kura ita, Nia bele hamoris ita. Jezús mak ita-nia esperansa”.
Dehan Amu-Papa Leão XIV durante audiénsia jerál iha Vatikanu, 25/06/2025. Fonte Notísia Vatikanu.
Milagre Rua Ne’ebé Moris Husi Fiar Tomak Iha Kristu
Milagre dahuluk ne’ebé konta iha Evanjellu tuir São Marcos envolve feto ida, hafoin sofre moras ida ne’ebé lori nia atu hadook-an hosi sosiedade tanba konsidera ema ne’ebé la moos, fiar katak Jesus iha kbiit atu kura nia.
Nune’e, nia lolo liman atu kona Nia iha ema lubun nia leet tanba nia fiar, Jesus kura nia no dehan ba nia: “Oan-feto, ó-nia fiar salva ona ó, bá ho dame.”
Iha milagre daruak, S. Marcos konta, Jesus halo moris-hi’as labarik-feto ida husi mate hodi hatán ba aman ida ne’ebé laran-susar nia suplika nakonu ho fiar, simu notísia katak nia oan-feto mate ona. Jesus dehan ba nia: “Keta taʼuk, fiar deʼit”, nia bá mane neʼe nia uma no haree ema hotu tanis no tanis, nia dehan: “Labarik neʼe la mate maibé toba deʼit.”
Ligadu ho epizódiu rua ne’e, Amu-Papa Leão XIV sujere katak bainhira ita fila ba Na’i ho konfiansa no fiar, la iha buat ida ne’ebé liu Ninia kapasidade sira.
“Jesus nia hahalok hatudu mai ita katak la’ós de’it Nia kura moras hotu, maibé Nia mós Kura ema hadeer hosi mate,” Papa Leão subliña.
“Ba Maromak, ne’ebé maka Moris Rohan-Laek, isin nia mate hanesan toba. Mate loloos maka klamar nian: ida-ne’e ita tenke ta’uk!”
Transforma Ita Nia Moris Husi Laran
Papa Leão mós subliña katak hafoin halo labarik-feto ne’e moris fali, Jezús hateten ba nia inan-aman atu fó buat ruma ba nia atu han, hodi hatudu ida-ne’e nu’udar sinál konkretu tebes Jesus nia besik ba ita-nia umanidade.
Amu-Papa hatete katak ida-ne’e fó kbiit atu ita komprende ida-ne’e iha sentidu kle’an liu no halo ita husu ba ita-nia an rasik pergunta ida, “Bainhira ita-nia oan sira iha krize no presiza alimentasaun espirituál, ita hatene oinsá atu fó ba sira? No oinsá ita bele, se ita rasik la hetan nutrisaun hosi Evanjellu?”
Santu Padre reflete kona-ba milagre ida-idak, hodi subliña oinsá sira la husik buat ida atu taka dalan ba sira nia fiar iha Maromak atu rezolve situasaun sira ne’ebe aat.
“Dalaruma,nita la hatene kona-ba ida-ne’e, maibé iha dalan segredu no reál, grasa to’o mai ita no neineik transforma ita-nia moris husi laran”.
Nia Sei Halo Ita Sai Foun
Dala barak, Santu Padre sujere, “ema barak hakbesik ba Jesus ho maneira superfisiál, lahó fiar loloos iha ninia kbiit. Ita la’o iha superfísie sira, ita-nia igreja nian, maibé karik ita-nia fuan iha fatin seluk!”
Relatu Evanjellu rua ne’e, Santu Padre konklui, hatudu katak la iha buat ida ne’ebé boot liu ba Jesus atu kura katak ita tenke bá hasoru Nia, tanba Nia sei halo ita sai foun.
Durante Audiénsia Jerál iha Basílica São Pedro, Papa Leão XIV fo bensa mós ba Jonathan Roumie (Autor Filme Jesus) ho família sira ne’ebe marka mós presensa iha audiênsia ne’e.
Produsaun filme ne’ebé produz hosi Jonathan Roumie alias “Jesus” atinji ona telespetadór liu millaun 280 iha mundu tomak ne’e aprezenta nia époka dalima iha Vatikanu.
Protagonista Jonathan Roumie (jonathanroumieofficial), ne’ebé interpreta Jesus, fó prezente ida ba Santu Padre Leão XIV no espresa nia agradesimentu kle’an ba oportunidade extraordináriu ne’e.
Jonathan Roumie (autor filme Jesus) destaka mós nia hanoin oinsá papél hametin fiar no transforma nia moris ida ba ksolok no laran metin iha Maromak.
Imajem furak liu hosi Audiénsia Jeral ne’e foti hosi média Vatican News.