PDC Promete Sosa Aviaun No Ró Foun Ba RAEOA, Hadia Jestaun Aeroportu Oecusse No Suai
Imajem : Presidente PDC Francisco de Araujo, iha RAEOA, 02/05/2023
SAPNewsTL, RAEOA : Partidu Democrata Cristão (PDC), tersa-feira ne’e kontinua hala’o Dialogo iha Suku Bobokase, Postu Administrativu Pante Makasar, Região Admimistrasaun Espesial Oecusse Ambeno(RAEOA) hodi aprezenta programa prioridade sira hanesan setor Transporte no komunikasaun ba militante sira
“Partidu Demokrata Cristão nia programa prioridade ba RAEOA mak hadia setor transporte no komunikasaun, difikuldade ba transporte Aero, Maritima no terrestre liliu oinsa ita tenki uza ho efetivu, ita iha ona Aeroportu RAEOA no Suai, maibe ita abandona hela, laiha aviaun komersial, nune’e PDC hakarak hadia problema hirak ne’e”. Tenik Presidente PDC Francisco de Araujo ba Jornalista sira, iha RAEOA, 02/05/2023
Francisco hatutan, “Durante ne’e komumidade sira difikuldade liu tanba Aviaun Zonas Especiais de Economia Social de Mercado Timor Leste (ZEESM-TL) ne’ebe mak halo operasaun seidauk sufisiente ba ita nia povu, Ba futuru PDC hetan fiar husi povu Munisipiu RAEOA sei sosa aviaun ne’ebe mak boot nune’e bele halo operasaun ho diak hodi bele tula ema barak liu husi 100”. nia promete
Prezidenti PDC mos Akresenta, “Ita nia Maritima durante ne’e, iha ona Ro Berlin Ramelau no Nakroman deit, iha futuru PDC iha planu sosa tan Ro’o, nune’e bele fasilita diak liu tan ita nia povu no turista sira ne’ebe mai halo vizita ita nia rai, bele mos sosa Ro’o ne’ebe mak bele halo operasaun ba mate isin”, nia sublina
Militantes PDC Suku Bobokase, Postu Administrativu Pante Makasar, Região Admimistrasaun Espesial Oecusse Ambeno(RAEOA)
Nia informa, “Ba futuru PDC mos iha programa ba transporte sira liu husi terrestre nian, tanba durante ne’e se ita hakarak asesu liu husi atambua, ita presija hola mos tiket sira ne’e, entaun hakarak ba futuru ne’e ita presiza halo koperasaun di’ak ho Indonesia atu fasilita Timor oan husi Atoni atu bele fasil ba sira mos bele liu dalan la presija urus surat hanesan visa no pasaporte atu sira la’o ho livre”, nia defende
Entretantu, Kona-ba Komunikasaun tanba “Durante ne’e Timor iha ona operator Telemor, Telekonsel no Timor Telekom maibe Internet susar ba ema atu halo Komunikasaun ne’ebe lais no baratu, Ita hatene vibra otika ne’e importante tebes bele utiliza no garante Komunikasaun ne’e lais no di’ak”. nia hatutan
lembra fali katak, desenvolvimentu fibra otika ne’ebe dada husi Australia atinje ona 30% no tuir planu ne’e finaliza iha tinan 2024
Jornalista : Lidia Amaral