Antes Aranka Ba Cambodia, SEJD-CDTL Ho CONTL Lori Atleta Hasoru PR Ramos Horta

SAPNewsTL, Dili: Sekretariu Estadu Juventude Desportu (SEJD) ho Konfederasaun Desportu Timor-Leste (CDTL sigla portuges) no Komite Nasional Olimpiku Timor-Leste (CONTL) lori atleta Timor -Leste hasoru malu ho Prezidente Republika (PR) Jose Manuel Ramos Horta antes aranka ba kompete iha Sea Games 2023 iha Cambodia ne’ebe sei realiza iha fulan maiu tinan ne’e.

“Ohin ita lori atleta kompete Sea Games 2023 iha Cambodia mai hasoru prezidente republika Jose Manuel Ramos Horta atu nune’e ofisialmente prezidente husik ona ita nia atleta sira atu partisipa Sea Games 2023 iha Cambodia iha fulan maiu, ohin mos ami aprezenta atleta sira durante halo preparasaun iha kazerna komesa fulan fevereiru to’o mai abril nune’e prezidente repúblika hatete mak atleta sira tenki dixiplina lori Timor-Leste nia naran morin iha Sea Games manan ka lakon maibe hatudu atitude diak tanba nu’udar embaixador mos”, dehan sekretariu jerál CONTL Laurentino Guterres ba jornalista sira iha Palasiu Prezidente Aitarak Laran, Dili tersa, (02/05/2023).

Sekretariu jerál hatutan, delegasaun Timor-Leste hamutuk ema nain-103 mak sei ba partisipa Sea Games iha Cambodia tinan ne’e husi modalidade 12, atleta ho ofisial hamutuk 90 maski iha tinan kotuk modalidade boxing, atletizmu ho taekwondo hetan medalla maibe tinan ne’e la obriga atleta sira hetan medalla tanba tuir sira preparasaun ho orsamentu minimu tuir kondisaun Timor-Leste iha no orsamentu ba deslokasaun hamutuk 147,000 USD.

Laurentino akresenta tan, atleta sira hamutuk nain-90 ne’ebe partisipa Sea Games 2023 iha Cambodia mai husi modalidade governu finansia mak taekwondo, karate-Do, voleibol praia, atletizmu, siklizmu no boxing ho atleta no ofisial hamutuk nain-27, husi modalidade finansia husi ninia organizasaun internasional mak E-sport atleta hamutuk nain-20 ho soft tenis.

Iha fatin hanesan prezidente CDTL Macario F. Sanches informa, orsamentu SEJD aloka ba CDTL halo preparasaun mak 82,000 USD nune’e atleta sira kada loron hetan 18,70 tan ne’e kompania manan tender ba hahan mos prepara tuir ida ne’e.

“Orsamentu ba preparasaun atleta sira nian kompete Sea Games 2023 iha Cambodia ami hetan alokasaun husi SEJD hamutuk 82,000 USD, ami prepara ba atleta sira nia hahan ami prepara 49,000 USD, nune’e atleta sira kada loron masimu hetan 18,70 USD ba han nian ita nia atleta sira han tuir orsamentu ne’e durante fulan rua tomak, hahan ne’e prepara husi kompania manan tender nune’e la signika katak kualidade hahan la diak maibe ita mos halo melloramentu hahan ba atleta sira tan ne’e tan deit hahan sei la hatun atleta sira nia espiritu no mentalidade kompete nian maibe sai hanesan dezafiu ba sira atu fo orgullu ba estadu ida ne’e”, tenik Macario 

Entretantu atleta Timor-Leste nain-90 kompete Sea Games 2023 ne’e sekretariu jerál CONTL informa mai husi modalidade 12 maibe tuir informasaun jornalista SAPNewsTL hetan husi sekretariu jeral ne’e hamutuk modalidade ualu deit, modalidade neen taekwondo, karate-Do, voleibol praia, siklismu, boxing no atletizmu mak governu Timor-Leste finansia no modalidade rua, E-sport no soft tenis mak finansia husi ninia organizasaun internasional rasik no modalidade haat seluk sekretariu jeral CONTL la fo sai ba públiku, delegasaun Timor-Leste sei aranka ba Cambodia iha loron aban, 3 fulan maiu 2023.

Reportajen: Augusto dos Santos