Ohin, Atleta TL Kompete Sea Games 2023 Aranka Ba Cambodia
Imajen: Atleta Sira Ho Treinador Husi Modalidade Karate-do Lao Tama Ba Airportu Internasional Nicolau Lobato Comoro, Dili Kuarta (03/05/2023).
SAPNewsTL, Dili: Atleta Timor-Leste loron ohin aranka ona ba Cambodia atu kompete Sea Games 2023 ne’ebe sei realiza iha loron 5 to’o 17 fulan maiu tinan 2023 tanba atleta sira ne’e prontu atu kompete ho nasaun sira seluk iha Sea Games tinan ne’e.
“Ohin ita nia atleta sira husi modalidade boxing, soft tenis, karate-Do no atletizmu aranka ba Cambodia atu partisipa Sea Games 2023 maibe ita nia atleta husi modalidade siklizmu ho futebol uluk ona no ita nia atleta husi modalidade voleibol praia no taekwondo sei aranka fali iha loron 8 fulan maiu 2023”, dehan sekretariu jerál CONTL Laurentino Guterres ba jornalista sira iha Airoportu Internasional Nicolau Lobato Comoro, Dili kuarta (03/05/2023).
Imajen: Sekretariu Jerál CONTL Laurentino Guterres.
Sekretariu jerál hatutan, horseik sira lori ona atleta sira hasoru malu prezidente repúblika Jose Manuel Ramos Horta nune’e prezidente repúblika fo ona mensajen ba atleta sira jogu manan ka lakon tenki dixiplina nafatin tanba atleta sira ba kompete ne’e hanesan mos embaixador ba Timor-Leste, sira husu ba povu Timor-Leste apoiu atleta sira ne’e husi orasaun no sira mos husu ba igreja iha domingu halo misa reza ba atleta sira atu nune’e sira partisipa ho diak manan ka lakon buat seluk tanba atleta sira kompete tuir nesesidade nasaun nian.
Iha fatin hanesan atleta Soft Tenis Matias de Sousa informa, sira senti orgullu tanba partisipa Sea Games ho finanseiru husi sira nia organizasaun internasional rasik la hetan apoiu finanseiru husi governu
“Ami atleta husi soft tenis senti orgullu maski ami partisipa Sea Games 2023 iha Cambodia ne’e ami hetan suportasaun masimu husi ami nia organizasaun internasional servisu hamutuk ho CONTL no governu la apoiu finanseiru maibe ami senti diak hela tanba ami ba mos reprezenta nasaun”, Matias hateten
Imajen: Atleta Martias de Sousa Husi Modalidade Soft Tenis.
Matias akresenta tan, karik sira ba mak hetan medalla depois sira fila mai Timor-Leste governu la rekunese mos diak tanba sira Timoroan nafatin importante mak hatudu talentu reprezenta nasaun lori Timor-Leste ba diak fila mai Dili mos diak nafatin.
Iha sorin seluk treinador karate-do Andreas da Silva dehan, sira nia esperansa ba atleta karate-do sei hatudu rezultadu diak tanba sira halo preparasaun masimu bazeia ba esperensia tinan kotuk.
“Ami nia esperansa ba atleta karate-do nian sei hatudu rezultadu diak iha Sea Games 2023 tinan ne’e tanba ami nia atleta halo preparasaun masimu atu kompete no ami iha ona esperensia bazeia ba tinan kotuk nian ami lakon tanba faila iha tekniku no tatiku ne’ebe agora ami halo mudansa ba ida ne’e durante iha preparasaun nia laran”, tenik Andreas
Imajen: Treinador Andreas Da Silva Husi Modalidade Karate-do.
Treinador afirma tan, sira husu ba povu Timor-Leste fo suportasaun masimu husi orasaun atu nune’e atleta sira bele kompete ho diak atu nune’e nasaun sira seluk bele hatene Timor-Leste katak Timoroan bele.
Entretantu delegasaun Timor-Leste partisipa Sea Games 2023 iha Cambodia hamutuk nain-103 inklui ona atleta ho ofisial sira husi modalidade voleibol praia, siklismu, boxing, taekwondo, karate-Do, atletizmu, soft tenis no E-sport no governu aloka orsamentu 146,000 USD ba delegasaun Timor-Leste partisipa Sea Games iha tinan ne’e.
Reportajen: Augusto dos Santos