Atleta Delio Ho Felisberto Prontu Hetan Medalla Iha Cambodia, Husu Povu TL Suporta Ho Orasaun
Imajen: Atleta Delio Mouzinho Husi Modalidade Boxing Informa Informasaun Ba Jornalista Iha Airoportu Internasional Nicolau Lobato Comoro, Dili Kuarta (03/05/2023).
SAPNewsTL, Dili: Atleta Delio Mouzinho husi modalidade boxing no FC Felisberto de Deus husi modalidade atletizmu prontu ona atu kompete iha jogu Sea Games 2023 iha Cambodia hodi hetan medalla osan mean maibe sira husu povu Timor-Leste (TL) suporta ho orasaun atu nune’e sira hatudu rezultadu diak.
“Hau prontu ona ba kompete Sea Games 2023 iha Cambodia nune’e hau iha esperansa atu hetan medalla osan mean tanba objetivu ida ne’e hau halo preparasaun durante ne’e maibe hau la promete tanba sei iha nakukun laran”, dehan atleta Felisberto de Deus ba jornalista sira iha Airoportu Internasional Nicolau Lobato Comoro, Dili kuarta (03/05/2023).
Imajen: Atleta Felisberto de Deus Husi Modalidade Atletizmu.
Felisberto hatutan, ba povu Timor-Leste sira nu’udar atleta reprezenta Timor-Leste partisipa Sea Games 2023 iha Cambodia husu suporta sira ho orasaun atu nune’e fo forsa ba sira forsa liu tab hanorin Timor-Leste nia naran iha jogu Sea Games tinan ne’e.
Iha fatin hanesan atleta Delio Mouzinho husi modalidade boxing hatete, nia esperansa boot katak sei la fila ho mamuk tanba hakarak sai manan nain dahuluk iha jogu Sea Games tinan ne’e hodi hetan medalla osan mean lori mai Timor-Leste.
“Uluk nanain hau fo obrigadu ba Timoroan sira hotu suporta ona orasaun mai hau tan ne’e hau iha esperansa boot katak hau sei la fila ho mamuk tanba hau hakarak sai manan nain dahuluk hetan medalla osan mean lori mai Timor-Leste tanba hau iha forsa no vontade no tempu to’o ona atu hatudu ba povu Timor-Leste hakarak”, tenik Delio
Delio informa, tinan kotuk iha Sea Games iha Vietnam hetan manan nain daruak medalla osan mutin maibe tinan ida ne’e nia iha esperansa boot hodi esforsu makaas hetan manan nain dahuluk hetan medalla osan mean lori mai Timor-Leste.
Iha Sorin Seluk treinadora atletizmu Odete Belo dehan, durante nia akompaña atleta sira treinu ne’e katak sira nia preparasaun masimu ona atu manan ka lakon ho dignidade tan ne’e husu ba povu Timor-Leste suporta ho orasaun.
“Hau nu’udar treinadora akompaña sira durante treinu ne’e ita nia atleta sira nia preparasaun masimu atu manan ka lakon mos ho dignidade nune’e ami hau husu ba povu Timor-Leste suporta ita nia atleta sira ho orasaun hatudu rezultadu diak iha jogu Sea Games tinan ne’e”, Odete hataten
Imajen: Treinadora Odete Belo Husi Modalidade Atletizmu.
Entretantu atleta husi modalidade boxing kompete iha Sea Games Cambodia tinan ne’e hamutuk nain haat ho treinador no ofisial ida no husi modalidade atletizmu mos nain haat hamutuk ho ofisial no treinador ida.
Reportajen: Augusto dos Santos