Atleta Boxing Simu 46 USD Kada Loron Ho Lima Rua Partisipa Sea Games 2023

SAPNewsTL, Dili: Atleta sira husi modalidade boxing  simu 46 USD kada loron ho liman rua bainhira partisipa jogu Sea Games 2023 iha Cambodia tanba kondisaun governu agora mak hanesan ne’e ona.

“Orsamentu ita nia governu aloka mai ami kada loron ami simu 46 USD ba partisipa Sea Games 2023 iha Cambodia ne’e ami atleta husi modalidade boxing agradese simu ho liman rua tanba situsaun governu mak hanesan ne’e”, dehan atleta Delio Mouzinho husi modalidade boxing ba jornalista sira iha Airoportu Internasional Nicolau Lobato Comoro Dili kuarta (03/05/2023).

Iha sorin seluk sekretariu jerál CONTL Laurentino Guterres informa, atleta sira ne’ebe sei partisipa jogu Sea Games 2023 iha Cambodia sei hetan orsamentu montante 46 USD kada loron nune’e atleta sira sei simu diferente bazeia ba sira nia partisipasaun.

“Ita nia atleta sira ne’ebe sei partisipa jogu Sea Games 2023 iha Cambodia sei hetan orsamentu montante 46 USD kada loron no orsamentu ne’e ita nia atleta sira sei hetan diferente tanba bazeia ba sira nia kompetisaun depois loron hira sira iha Cambodia”, tenik sekretariu jeral 

Sekretariu jerál CONTL hatutan, atleta sira ne’e sei hetan orsamentu total diferente tanba atleta balun bainhira nia kompete hotu ona fila kedas balun mak tama ba etapa final sei hein to’o loron 17 fulan maiu 2023 mak remata no orsamentu ba delegasaun Timor-Leste nain-103 desloka ba Cambodia ho montante 147,000 USD.

Laurentino informa, atleta sira partisipa Sea Games 2023 iha Cambodia ne’e mai husi modalidade governu finansia mak taekwondo, karate-Do, voleibol praia, atletizmu, siklizmu no boxing ho atleta no ofisial hamutuk nain-27, husi modalidade finansia husi ninia organizasaun internasional mak E-sport atleta hamutuk nain-20 ho soft tenis nain haat.

Reportajen: Augusto dos Santos