Pe. Calisto : Juventude Tenki Hamoris Ispíritu Damen, Domin & Unidade
SAPNewsTL, Oe-cusse : Iha missa Selebrasaun Festa Natal Pe. Calistu Seco Jezuinha Husu Joventude Oelafab kontinua hamoris nafatin unidade iha komunidade nia let.
Iha omilia Pe. Calisto Seco Jezuinha haktuir natal hanesan festa familia iha ne’ebe nia hun mai husi Jose, Maria no Jesus nu’udar familia nazare.
“Natal ne’e festa Familia, no familia ida ne’e nia hun ne’e Josè, Maria no Jesus ne’ebe sira nia kaminada to’o Jesus moris ne’e interesante, desde maromak hili sira sai maromak nia inan no maromak nia aman atu tau matan ba Jesus maromak nia oan”. Dehan Pe. Calistu Seco Jezuinha hafoin remata missa selebrasaun natal ba jornalista SapnewsTL iha Igreja Estasaun Missionario Oelafab, Oe-cusse, 24/12/2023.
Amo Calisto hatutan familia nazare ne’ebe husi Jose, Maria sempre hasoru dezafiu tanba ne’e familia tenke hanoin fali dezafiu ne’ebe iha hodi hametin nafatin unidade iha familia.
“Jose ho Maria hasoru dezafiu ne’ebe kuaze atu hanesan entaun ne’e katak natal ne’e festa familia festa ne’ebe ita selebra hamutuk laos kontenti deit maibe hanoin fila dezafiu sira ne’e, dezafiu sira ne’ebe ita infrenta hamutuk, dezafiu sira ne’ebe maromak koloka atu nune’e ita buka kosok oan moris iha ne’ebe, bainhira ita kosok oan ida ne’e sei unifika sei lori unidade ba familia, entaun festa natal ne’e festa familia”. Tenik Padre Calisto
Pe. Calisto akresenta ho ispiritu natal tinan 2023 ninian, mai hamutuk hanesan ne’e laos atu naran komemora deit, “Ita hamoris fila fali tempu ida uluk jesus moris ne’e, tanba ida naroman ne’ebe mosu iha nakukun laran ne’e hein katak naroman ida ne’eba ne’e tama to’o ema ida-idak nia moris no to’o familia nia moris, atu lori mudansa balun, atu familia bele rona malu ka hadia moris tuir doutrina katolika nian.”
Pe. Calistu Seco Jezuinha husu ba sarani sira atu nafatin iha espiritu unidade nafatin, hamoris espiritu ne’ebe iha sai nafatin sarani no sidadaun ne’ebe los.
“Fahe buat ne’ebe ita iha, ho ema seluk liu-liu sira ne’ebe presiza no husu ba sarani Oelafab ita hare anin hu’u maka’as ona sira prepara natal liu-liu joven sira, joven sira ne’e ita hare ispiritu unidade ne’e eziste, entaun hau nia mensagem ba sira atu kontinua hamoris ispiritu ida ne’e, ispiritu ida ne’ebe servisu hamutuk no ispiritu ida ne’ebe partilla sira nia talentu”. Nia hato’o
Iha fatin hanesan, sarani Inacio Tout sente kontenti tanba bele simu kosok oan ne’ebe moris hodi fo dame no domin ba familia sira iha mundu.
“Ami Senti kontenti tanba tinan ida ne’e selebrasaun natal nian simu kosok oan nai jesus ne’ebe mai ho domin no fo dame mai ami sarani estasaun misionario Oelafab, Nia hanesan ema simples ida ho nia inan maria ho nia aman são jose, ne’ebe sente simu nai kosok oan ho kontenti iha kalan ida ne’e”. Nia hatete
Inacio hein katak , tinan ida ne’e ho prezensa kosok oan nian bele lori dame no harmonia ba familia hotu.
“Ha’u nia esperansa iha tinan 2023 ida ne’e ita simu natal ho kontenti no natal ida ne’e mai lori dame no domin ba ami sarani tomak parokia no sarani estasaun misionario Oelafab no ba sarani hotu iha nasaun ida ne’e”. Nia aumenta
Enkuantu, Tuir observasaun jornalista SAPNewsTL iha Rejiaun Administrativu Espesial Oe-cusse Ambeno (RAEOA) nota katak selebrasaun loron natal iha rejiaun refere hetan partisipasaun maksimu husi sarani sira no selebrasaun ne’e la’o iha ambiente paz no hakmatek.
Jornalista : Sergio Lelan