PN Aprova OJE Ba Gabinete Vise PM II Hamutuk Tokon $ 1 & Vise PM I Ho $ 400.000

Imajem : Vise Primeiru Ministru II Ba Asuntu Sosiais Mariano Assanami Sabino Iha PN, 13/11/2024. Foto : Media : G-VPM

SAPNewsTL, Dili : Orsamentu Jeral Estadu (OJE) 2025 ba Gabinete Vise-Primeiru Ministru ba Assuntu Sosiais nian, Parlamentu Nasionál fo passa iha diskusaun faze espesialidade ho montante hamutuk tokon $1.100.000,00.

Tinan 2025, Orsamentu Jeral Estadu ba Gabinete Vise-Primeiru Ministru Asuntu Sosiais nian ne’ebe hetan aprovasaun hamutuk tokon $1.100.000,00.

Nune’e, orsamentu ne’e sei aloka ba salariu no vensimentu hamutuk rihun $710.540,00, Bens no Servisus hamutuk rihun $384.460,00, Transferensias Publika 0, Kapital Menor 0 no Kapiltal Dezenvolvimentu 0.

Orsamentu inisiu ba Gabinete Vise-Primeiru Ministru Assuntu Sosial hetan aprovasaun ho votus Afavor  hamutuk 42,  Abstensaun 2 no Kontra 20.

Durante debate, Vise Primeiru Ministru Asuntu Sosial, Ministru Dezemvolvimentu Rural no Habitasaun Komunitáriu fo obrigadu ba deputadu sira ne’ebe hatudu debate ida diak teb-tebes ba orsamentu iha Parlamentu Nasionál.

“Obrigadu barak ba hanoin, debate, diskusaun ne’e importante teb-tebes, Partidu Demokrátiku defende nasaun demokrátiku ne’ebe ita gosta debate, maibé ita fokus ba orsamentu, orsamentu agora por programa, orsamentu labele muda ba mai hanesan uluk, maibe osan ho programa, wainhira la halo fila fali ba kofre estadu”. Tenik Vise Primeiru Ministru Asuntu Sosial, Ministru Dezemvolvimentu Rural no Habitasaun Komunitáriu iha PN, 13/11/2024

Enkuantu, Orsamentu bá Vise Primeiru Ministru Asuntu Ekonomia ho montante hamutuk rihun atus haat ($400.000) aprova ho votus afavór-42, kontra 17, abstensaun 3.

PN Aprova mós Orsamentu Prezidénsia Konsellu Ministru nian bá tinan 2025, hamutuk ho Orsamentu bá Sekretária Estadu Igualdade no Sekretária Estadu Komunikasaun Sosiál ho votu a favór 41, kontra 18 no abstensaun 2.

Orsamentu Prezidensia Konsellu Ministrus nian ho totál $4.956.893 hodi finansia Programa 2 no subprograma 10. Hosi totál ida-ne’e $2.929.942 bá saláriu no vensimentu no $2.026.951 bá bens no servisus.

OJE ba tinan 2025 governu prevé orsamentu hamutuk billiaun 2, 617 milliõens (2.617 Millioens), Parlamentu Nasionál aprova ona iha faze jeneralidade, daudaun ne’e Parlamentu Nasionál halo hela debate iha faze espesialidade.

Jornalista : Marcela Mery da Costa