Polémika Fakuldade Direitu ! Estudante UNTL Krítika Malu

SAPNewsTL, Dili : Estudante faluldade direitu hala’o komunikadu imprensa hodi kontra deklarasaun husi assosiasaun estudantil iha kampus sentral UNTL kona ba aktu dosente sira iha Fakuldade Direitu UNTL.

Antes ne’e, Assosiasaun Estudantil halo komunikadu imprensa hasoru Estrutura Fakuldade Direitu UNTL iha loron 2 Fulan Abril katak dosente kontra regulamentu akadémika UNTL tanba la hanorin tuir orariu, abandona aula, taka sai valor tarde no estudante balun nia notas lakon tanba la arkiva.

Maske nune’e, maibe estudante fakuldade direitu konsidera komunikadu imprensa ne’ebe halo husi Asosiasaun Akadémiku Fakuldade de Direitu iha dia 02 de abril 2024, ne’e la halo investigasaun kle’an, ikus mai foti konkluzaun la ho forma akadémiku.

“Ami estudante ativu husi Faculdade de Direito halo komunikadu imprensa ida ne’e ho objetivu atu hatu’ur lolos problema ne’ebe mak akontese problema iha fakuldade direito. Nune’e, komunikadu imprensa ida sei kobre : 1) apresiasaun, 2) antíteze 3) eskluzaun kulpa pesoál dosente, tanba komunikadu imprensa ne’ebe halo husi Assosiasaun Akadémiku Fakuldade de Direitu iha dia 02 de abril 2024, ne’e la halo investigasaun kle’an, ikus mai foti konkluzaun la ho forma akadémiku.”Tenik Porta Voz Estudante José da Costa ba Jornalista sira iha Kampus Sentral UNTL, 12/04/2024

Jose da Costa konsidera Komunikadu imprensa ida ne’ebé sira halo la’os manifestasaun husi vontade estudante fakuldade de direito hotu-hotu nian. Tamba la iha diálogu efetivu ho estudante hotu hotu ne’ebe hamahon an iha fakuladade direitu.

Relasaun ho dosente asistente ne’ebe hanorin iha fakuldade direitu ne’e tanba bazeia ba lei previstu iha artigu 10, tuir Decreto Lei No. 62/2022, ne’ebe halo ona 3° alterasaun ba decreto lei no.7/2011 konaba estatuto da carreira docente universitáriu nian.

“Ligadu ba dosente asistente ne’ebé fo aula teoria no prátika, ami hakarak kontesta katak, lei rasik mak permite ba dosente titular atu permite ba asistente sira hodi fo aula ka dezempeña funsaun idéntiku ho mestre, ne’ebe previstu iha artigu 10, tuir Decreto Lei No. 62/2022, ne’ebe halo ona 3° alterasaun ba decreto lei no.7/2011 konaba estatuto da carreira docente universitário.”

Deklarasaun ne’ebe sira hato’o, indireitamente fó kulpa ba sujeito ka dosente balun deit, maibe la konsege hare’e problema ne’e to’o nivel institusionál ka nia totalidade husi problema ne’e rasik, liliu iha fakuldade Direito.

“Tuir ami-nia investigasaun, problema ne’ebé akontese interna iha fakuldade direitu nian, la’os kulpa ba individu dosente ida nian, hanesan saida mak sira deklara, maibe problema ne’e abut lolos integradu direita ho mal jestaun administrativa UNTL, liu-liu, iha ekipa reitoriál ne’ebé lidera hosi Magnifiku Reitór ho nia estrutura ne’ebé halo nia funsaun la ho di’ak hanesan: Vise-Reitór Asuntu Akadémiku no Garantia Kualidade, Vise-Reitór Asuntu Administrasaun, Finansas no Administrasaun Jerál, Pro-Reitór ba Asuntu Planeamentu, Monitorizasaun no Avaliasaun, Pro-Reitór ba Asuntu ba Inspeksaun, Auditóriu no Kontrolu ba Kualidade.”

Efeitu husi mál jestaun, ne’e nia implikasaun mak hamosu problema hirak ne’ebe fakuldade dureitu infrenta, mak hanesan: falta dosente permanente no kontratadu, inkumprimentu ba kalendáriu UNTL no mos problema sira seluk tan, ne’ebé Asosiasaun deklara ona iha komunikadu Imprensa iha semana kotuk.

Estudante fakuldade direitu husu ba magnífiku reitor UNTL hodi rezolve problema ne’ebe akontese iha tempu badak no Ministériu Ensinu Superior Siénsia no Kultura (MESSK) hodi fo kontrolu ba UNTL.

“Ami estudante ativu husi fakuldade direitu, hakarak ezije ba reponsável másimu UNTL hanesan Magnífiku reitor ho nia estrutura tomak hodi toma medida adekuadu atu rezolve problema hirak ne’e iha tempu badak. Ami mos hakarak ezije ba Ministériu Ensinu Superior atu halo kontrolu másimu ba nia órgaun tutelar (UNTL)”. Nia husu

Estudante ativu hirak ne’e husu mos ba estrutura assosiasaun estudantil atu hatene valoriza no dignifika dedikasaun dosente sira nian iha UNTL

“Ami hakarak husu ba Asosiasaun fakuldade Direitu, atu la bele foti konkluzaun la ho peskiza ne’ebe kle’an, hodi fo kulpa ba pesoal dosente sira. Sujere ba estudante fakuldade Direitu atu valoriza no dignifika dedikasaun dosente sira nian ne’ebe durante hanorin ita maske iha mal jestaun husi ekipa reitoriál UNTL.”

“Sujere ba asosiasaun estudantil fakuldade direitu atu hatuur nia pozisaun ho lolos ba reprezentasaun estudante hotu hotu.
Alerta ba individu hotu hotu, liu liu, estudante no dosente akadémikas atu sai lian ida hodi ezije ba UNTL atu intervein lalais hodi solusiona problema ne’ebe fakudade Direitu infrenta tinan barak.” Jose da Costa sublinha

Estudante sira mos husu dosente sira hodi mantein prestasaun no profisionalidade hodi hanorin estudante sira

“Ami hakarak enkoraja nafatin ba pesoal dosente permanente, kontratadu inklui dosente voluntáriu atu mantein ka hatudu nafatin profisionalizmu nu’udar dosente ne’ebe durante ne’e hanorin ami”. Nia konklui.

Iha sorin seluk, Senadu Estudantil konsidera deklaraun hirak ne’e lalos no nia parte rezeita tanba assosiasaun halo ona dialogu no konsultasaun ho estudante inklui komunika ona ho estrutura fakuldade no universidade, molok hala’o komunikadu imprensa iha loron 2 fulan Abril.

“Ha’u rezeita deklarasaun ne’e, deklarasaun ne’e falsa no la verdadeiru, sira ne’ebe halo komunikadu imprensa ne’e grupu ilegal ne’ebe pasivu iha enkontru sira, molok ami halo komunikadu imprensa ami halo ona dialogu, komunika ho estrutura fakuldade no universidade”. Senadu Estudantil Fakuldade Direitu Cristovão de Araujo

Lider Estudante UNTL mos husu ba estudante hotu hodi brani hodi ko’alia lialos no defende estudante sira nia direituw tanba asaun ne’ebe assosiasaun estudantil halo ne’e diak ba estudante sira no la hamonu naran diak fakuldade direitu nian.

“Ha’u husu ba estudante hotu liliu estudante direitu atu brani koalia sai lialos, wainhira dosente sala dehan sala, los dehan los, ne’e mak importante’. Nia hameno

Enkuantu, relasiona ho preokupasaun hirak ne’e, estrutura fakuldade direitu mos sei halo reuniaun iha tempu badak hodi solusiona problema refere iha tempu badak.

Jornalista : Marciana da Conceição & João Marito