Fasilita Kooperativa Rural ! BCTL & SEKoop Renova Akordu

Imajem : Governador Banco Central de Timor-Leste (BCTL), Elder Lopes hamutuk ho Sekretaria Estadu Kooperativa asina akordu servisu, iha Suai room Timor Plaza, Quinta (11/04/2024).

SAPNews TL, Díli – Banco Central de Timor-Leste (BCTL), selebra akordu ho Sekretaria Estadu Kooperativa (SEKoop), objetivu husi akordu ne’e atu promove inklusaun, investimentu no reforsa serbisu kooperativa parsial entre SEKoop ho BCTL iha teritoriu nasional.

Governador Banco Central de Timor-Leste (BCTL), Elder Lopes hateten, SEKoop asina akordu ne’e hanesan kontinuasaun akordu ne’ebe Governu anterior hala’o ona ho Banco Sentral, entaun renova akordu ne’e hodi kontinua serbisu hamutuk fila fali entre SEKoop ho BCTL.

“Banco sentral serbisu hamutuk ho Sekretária Estadu Kooperativa (SEKoop) liga liu ba asuntu tolu ne’ebe importante, primeiro atu promove inklusaun, katak povu iha area rurais bele senti serbisu ne’ebe SEKoop hala’o, Segundo maka Banco hamutuk ho SEKoop, promove investimentu ba mikro, Kiik no médiu sira ne’ebe fasilita husi atividade kooperativas liu-liu iha atividade negosiu iha area rurais no Terseiru maka Liu husi akordu ne’e oinsa SEKoop ho Banku Sentral serbisu hamutuk hodi suporta koperativa iha teriroriu nasional, “Dehan Governador Banco Central de Timor-Leste (BCTL), Elder Lopes, iha Suai room Timor Plaza, Quinta (11/04/2024)

Nia akresenta kooperasaun ida ne’e parte rua sei serbisu hamutuk, Sekretária Estadu Kooperativa sei implementa programa rua (2).

“SEKoop sei fó formasaun finanseira literasia ba membru kooperativas sira ne’ebe identifika no organiza ona husi SEKoop kona ba kooperativa mai ho natureza uniaun kredivel, no serbisu hamutuk maka halo supervizaun, monitorizasaun no akompanhamentu ba atividades kooperativas liu-liu atividade kredivel iha nivel nasional”, Nia Hakotu.

Jornalista : Eleonora Fátima