Portugal Oan ! Adré Ho Idade 36, Orgullu Sai Estudante UNTL

SAPNewsTL, Dili : Iha ambitu orientasaun akadémika tinan 2024 ne’ebe hala’o iha auditorium Fakuldade Engenharia Siénsia no Teknolojia, Universidade Nacional Timor Lorosa’e (FEST-UNTL), Estudante foun Portugal oan, Adré Espínola haktuir, nia parte sente kontente tanba bele tama iha UNTL no kunhese kolega foun barak iha fakuldade engenharia.

Wainhira Presidente Assosiação Académica Estudantil FECT UNTL Sergio Alves da Costa bolu estudante  foun ne’e sa’e ba palku leten, Adré Espínola ho haksolok hakat sa’e ba palku leten no sira dada lia badak iha lian inglesh.

Senadu Sergio : Ita bele halo introdusaun badak ba ita nia identidade pessoal ?
Adré Espínola : Ha’u nia naran Adré Espínola, agora halo tinan 36, Ha’u Portugal oan, hela ona tinan 12 iha Timor-Leste. Ha’u nia fen ema Timor oan no agora ha’u nia oan na’in tolu ona.

Senadu Sergio : Ita nia sentimentu oinsa, wainhira ita tama iha UNTL liliu tur hamutuk ho foinsa’e sira durante orientasaun akadémika ?
Adré Espínola : Em prinsípiu, ha’u kontente tanba ha’u remata tiha ensinu sekundária iha Portugal, kleur la kontinua estudu, ohin bele tama UNTL no kontinua fali estudu lisensiatura. Ha’u sente konfortavél tebes tur hamutuk ho foinsa’e sira, ha’u la moe atu aprende, ha’u sei kontinua aprende nafatin ba oin ho foinsa’e sira.

Senadu Sergio : Ita nia esperansa saida ba UNTL, Esperansa pessoal sai estudante UNTL iha futuru ?
Adré Espínola : Ha’u haree katak UNTL, universidade ida ne’ebe diak liu no úniku iha Timor-Leste, ha’u hili UNTL sai hanesan ha’u nia espasu ba perkursu akadémiku ne’ebe bele lori ha’u dezenvolve, ha’u nia kunhesimentu no abilidade profisional ba futuru, tanba daudaun ne’e ha’u iha kompanha ida.

Ha’u nia esperansa katak ha’u sei esforsu no buka aprende ho maluk Timor oan sira durante tinan 5-6 iha fakuldade ida ne’e liliu departamentu eletrónika no elétrika. Ha’u hein katak kolega sira hotu sei hakaas an liu tan hodi fo susesu ba estudu ida ne’e. Ha’u mos sei gradua iha loron ida no ha’u bele kontinua mestradu karik iha tan oportunidade.

Senadu UNTL : Ita nia mensagem ida ba maluk estudante foun sira ?
Adré Espínola : Ha’u hakarak katak ema hotu presiza eskola ka edukasaun importante tebes ba ita nia moris, ita tenki estuda no eskola diak para bele sai ema profisional no kompetitivu ba nasaun iha futuru. Parabens ba ita hotu, espera ita hotu bele sai susesu no profisionál.

Iha fatin hanesan, Membru Componente da Força Naval Ligeira na’in tolu ne’ebe hetan mos oportunidade hodi estuda iha UNTL, Estudante foun departamentu infórmatika ne’e dehan nia orgullu tama UNTL, idade laos sai bareira ba ema ida, se nia sei iha vontade hodi aprende no eskola.

“Ha’u sente orgullu, ha’u orgullu aprende ho maun no bin sira iha orientasaun akadémika, ba ha’u, idade ne’e la sai sasukat ba ita hodi aprende, se ita iha interese hodi eskola no aprende. Futuru nasaun ne’e presiza ema matenek, entaun ita tenki buka aprende aprende para sai matenek no susesu”. Nia dehan liu husi dada lia ho Senadu Estudantil Sergio Alves da Costa iha auditorium kampus hera, 08/03/2024.

Iha Fakuldade ne’e, iha mos estudante foun sira husi komunidade xineza sira ne’ebe mos mak moris kleur ona iha Dili no  Munisipiu Likisa, Postu Administrativu Bazartete.

Estudante foun ne’ebe regista iha Fakuldade Engenharia Siénsia no Teknolojia UNTL hamutuk atus haat ruanulu (420) ne’ebe kompostu husi Departamentu Mekánika, Informatika, Sivil, Eletrónika no Elétrika no Geolojia no Petróleu.

Jornalista : Marcela Mery da Costa