Prepara Ba Sea Games ! FEKATIL Realiza Kampionatu Nasional 2025

Imajem : Atleta nain-75 hosu Federasaun Karate-Do Timor-Leste (FEKATIL) iha salão Tres de Março Maubai Comoro, Dili sabadu (26/04/2025).

SAPNewsTL, Dili : Federasaun Karate-Do Timor-Leste (FEKATIL) realiza kampionatu nasional senior 2025 kompete husi atleta nain-75 hodi prepara ba jogu Sea Games 2025 iha Tailandia.

“Ohin, ami realiza kampionatu nasional ho objetivu atu halo selesaun nasional ba ita nia atleta potensial tekniku no fiziku diak hodi prepara ba jogu Sea Games 2025 iha Tailandia”, dehan Prezidente FEKATIL Filomeno Saores de Araujo ba jornalista sira iha salão Tres de Março Maubai Comoro, Dili sabadu (26/04/2025).

Filomeno hatutan, kampionatu nasional ne’e rasik partisipa husi munisipiu lima, Aileu, Bobonaro, RAEOA, Lautem, Viqueque hamutuk ho Dili A, Dili B no selesaun nasional FEKATIL, atleta mane nain-38, feto nain-27, ofisial nain sia no treinador nain sia.

Nia informa tan, Atleta feto sira ne’e kompete iha klase -50 kg, 55 kg no 61 kg, atleta mane sira kompete iha klase 55 kg, 60 kg, 67 kg no -75 kg.

Prezidente ne’e fo agradese ba MJDAC tanba fo apoiu finanseiru 15,000 USD ba realiza kampionatu nasional hodi fo oportunidade ba FEKATIL hodi halo selesaun atleta Karate-Do ba jogu Sea Games tinan ne’e.

Kampionatu ne’e rasik partisipa mos husi Ministru Juventeude Arte Kultura Nelyo Isaac Sarmento, embaixador Japaun ba Timor-Leste Tetsuya Kimura, Sekretariu Jeral CONTL, no Prezidente CDTL.

Reportajen : Augusto Dos Santos