Prepara Joven Ba Area 22 ! SEFOPE Lansa Formasaun Lian Japaun
Imajem : SEFOPE, Embaixador Japaun hamutuk ho parseiru sira lansa formasaun lian Japaun iha sentru CNFP Becora 21/06/2024. Foto : Media SEFOPE
SAPNewsTL, Díli — Sekretáriu Estadu Formasaun Profisional no Emprego (SEFOPE sigla Portugués), Rogerio Araujo Mendonca, hamutuk ho embaixador Japaun no parseiru sira, ofisialmente lansa formasaun lingua Japaun, iha Sentru Nasionál Formasaun Profisiónal (CNFP sigla Portugués) Becora
Tuir Sekretáriu Estadu Formasaun Profisional no Emprego Rogerio Araujo Mendonca hateten, Governu Timor-Leste liu husi SEFOPE servisu hamutuk ho Embaixador Japaun iha Timor-Leste Tetsya Kimura, bele realiza serimonia lansamentu lingua Japaun iha sentru CNFP, atu bele fasilita formasaun ba Joventude sira.
“Durante ne’e SEFOPE servisu hamutuk ho Embaixador Tetsya Kimura no sempre komunika ba empregador sira iha japaun, entaun prosesu ne’e naruk maibé ita agradese tamba ohin ita lansa ona formasaun lingua Japaun”. Dehan Sekretáriu Estadu Formasaun Profisional no Emprego, Rogerio Araujo Mendonca ba Jornalista sira iha sentru CNFP Becora 21/06/2024.
Nia hatutan, ekipa SEFOPE servisu maka’as hafoin hala’o lansamentu, tamba prosesamentu lingua Japaun diferente ho lingua inglés, prosesu sira tenki liu husi faze preparasaun masimu. Prosesu ne’e la fasil hanesan, fatin balun ba nasaun Australia nian, numeru trabalhador sira barak mak Governu haruka ona ba serbisu, Tenik nia.
“Sentru formasaun prepara ona 14 Pesoas ne’ebe ita atu haruka ba Japaun, vizita ba dala rua nian iha rai ida naran Ibara, Ita hetan mos empregador ne’ebe maka hakarak fo servisu ba Timor oan iha area 22 bele hateten area ne’ebe maka barak teb-tebes, Oinsa ita prepara kondisoens ba ita nia Joven sira liu-liu sira iha koiñesementu ba lingua Japaun”.
Sekretáriu Estadu SEFOPE akresenta, edukasaun no siensia ne’ebe trabalhador sira hetan labele lakon deit, maibé sira oferese fila fali ba Joven sira ne’ebe maka presija formasaun lingua Japaun, hodi asesu ba kampo de trabalu. Tanba ne’e maka ita konvida parte de Defesa nian hodi marka prejensa iha ne’e atu suporta formadores ne’ebe maka SEFOPE rekruta.
“Lingua Japaun ne’e difisil tanba ne’e maka serimonia ida ne’e konvida mos parte Ministerio Defesa, prezensa husi representante Tanente Jeneral Falur Rate Laek Brigadeiru komandante Amigu Veteranus, tanba durante ne’e ita bele hatete Membru Falintil Forsa Defesa Timor-Leste (F-FDTL) barak maka Eskola iha Japaun” Tenik nia.
Enkuantu, serimonia lansamentu lingua Japaun ne’e hetan apoiu orsamentu husi Fundu de Dezenvolvimentu do Capital Humano (FDCH) hodi koloka ba parte sira ne’ebe liga ba estabelesementu formasaun lingua Japaun.
Imajem SEFOPE Ho Parseiru sira iha serimonia lansamentu lian Japaun
Iha fatin hanesan, Embaixador Japaun Tetsya Kimura hateten, nia parte hato’o agradesimentu no apresia tebes ba serbisu maka’as entre Governu Timor-Leste ho Governu Japaun, ne’ebe dadaun ne’e Timor oan nain sanulu resin ha’at hala’o hela treinamentu iha provinsia agrikola Bopji.
“Ami hein katak ne’e sei kompleta tan iha futuru, Ami konsidera importante tebes ba foinsa’e Timor oan sira atu aprende, abilidade ba sira nia futuru tanba Japaun interese atu simu estajiariu iha provínsia sira seluk, hanesan kompanha konstrusaun lidera hela atu investe iha Timor-Leste mos atu simu estajiariu tekniku ba Japaun”. Nia dehan
Embaixador Tetsya Kimura salienta programa estajiu tekniku atu hetan abilidade bainhira serbisu atu kontribui ba dezemvolvimemtu iha Timor.
Bainhira trabalhador sira fila mai, programa ne’ebe envolve foinsa’e sira sei fo vantagen ba Japaun no mos ba Timor-Leste hanesan nasaun.
“Formasaun iha Japaun importante tebes ba formandu hotu atu adopta moris iha Japaun, aprende lian no kultura Japaun sai esensial tebes, iha fulan Junho nia laran. Embaixada Japaun sei vizita provínsia no enkoraja estajiadu tékniku husi Timor-Leste” Nia hakotu.
Jornalista : Dircia Baptista Belo