Presidente Repúblika Sei Halo Deklarasaun Iha Assembleia Jerál ONU
SAPNewsTL, Díli : Presidente da Repúblika José Ramos Horta orseik halo ona nia viajem hodi kontinua ba Nasaun Amerika hodi partisipa iha sesaun abertura Assembleia Jerál Organizasaun Nasoens Unidas (AJ-ONU) ba dala LXXVIII ho tema “Rekonstrui Konfiansa no Hametin Solidariedade Global”.
Presidente Repúblika hateten, nia sei reprezenta estadu Timor Leste hodi hato’o ninia deklarasaun iha sesaun Assembleia Jerál ONU ba dala LXXVIII iha Nova Yorke
“Ha’u sei halo viajem ba Nova Yorke iha loron 17-23 fulan Setembru 2023, atu representa Timor-Leste no fo deklarasaun iha sesaun Assembleia Jeral ONU ba dala LXXVIII ne’ebe sei realiza iha fulan Setembru to’o Dezembru 2023”.Hateten Presidente Repúblika José Ramos Horta ba Jornalista iha Aeroportu Internasional Comoro, Sexta 15/09/2023
Xefe Estadu Timor Leste ne’e informa líder mundial sira sei partisipa iha Assembleia Jerál ONU ne’ebe ho tema “Rekonstroi Konfiansa no Hametin Solidariedade Global”.
“Líder mundu sira nian sei hamutuk iha Nova Yorke ba abertura sesaun Assembleia Jerál ONU ba dala LXXVIII, atu partisipa iha debate jeral nível ass ho tema ‘Rekonstrui konfiansa no hametin solidariedade global’, aselera asaun kona ba ajenda 2030 no ninia objetivu sira ba dezenvolvimentu sustentável nian ba paz, prósperiedade, progressu no sustentabilidade ba ema hotu”. PR José Ramos Horta informa
Presidente José Ramos horta mos salienta Timor-Leste sei fo deklarasaun iha debate Jeral Reuniaun (ONU) ba dala 78 iha loron 21 fulan Setembru 2023 atu fahe progressu ne’ebe Timor-Leste atinji ona iha desenvolvimentu Politiku no ekonomiku iha tinan hirak ikus ne’e
Ramos Horta mos sei partisipa iha dialogu kona ba dezenvolvimentu sustentável ho tema halo reziliensia no la husik ema ida iha kotuk no sei marka prezensa iha resepsaun ida ne’ebe organiza husi Presidente Estadus Unidos Amerika Josep Robinnete Biden Jr.
Presidente José Ramos Horta mos sei hato’o diskursu importante ida kona ba investimentu iha seguransa ai-han, solusaun inovativu hodi resolve krize hamlaha iha Nasoens Unidas nian.
Iha parte seluk, Presidente Ramos Horta mos sei partisipa iha eventu ida ne’ebe organiza husi Nasaun Tailândia kona ba promove parseria ba ita nia futuru komun haforsa parseria Multi-Stakeholder ba aselera ODS (Objetivu Dezenvolvimentu Sustentável) iha ASEAN no iha Organizasaun Mundiál Saúde (OMS) organiza konferensia kona ba prevensaun no kontrola moras la komunikavel.
Entertantu, Xefe Estadu mos sei partisipa iha eventu paralela ne’ebe sei organiza husi Millenium Corporation Challenge kona ba investimentu ho impaktu boot no Timor-Leste sai hanesan benefisiária ida husi Fundus MCC
Jornalista : Aquelina Magalhães