Karreta Truck Baku Fila Iha Iliomar, Watukarbau Oan Ida Mate
SAPNewsTL, Lautém: Ohin Loron 16 Fulan Setembru 2023, iha oras mais ou Menuz tuku 2 loraik, mosu asidente tráfegu ida ka Karreta Truck ida baku fila iha área Suku Tirilolo Postu Administrativu Iliomar, Munisipiu Lautém rezulta sidadaun mane ida mate no na’in 6 sofre Kanek inklui labarik ida
Tuir Informasaun ne’ebé SAP News Timor-Leste asesu liu husi via kontaktu ho sasin Azito dos Santos ne’ebe ho motor haree direitamente iha fatin akontesimentu ne’e haktuir karreta truct ne’e tula ema hamutuk 12 no karau rua hodi ba halo lia iha Suku Tirilolo Postu Iliomar mak baku fila iha dalan tanba nia eixu tohar
“Karreta Truck ne’e tula ema na’in 12 no karau rua husi Postu Administrativu Watukarbau, Munisipiu Viqueque hodi ba halo lia iha Postu Iliomar Munisipiu Lautém mak sofre asidente iha dalan tanba karreta truck nia eixu tohar, wainhira sa’e subida”. Tenik Sasin Azito dos Santos ba Jornalista SAPNewsTL iha Iliomar, 16/09/2023
Sasin husi akontesimentu ne’e hatutan, karreta truck refere halai uluk, nia iha kotuk mak karreta ne’e para derepente no kondutor la konsege kontrola tanba halai sa’e foho, ikus mai karreta truck ne’e baku fila hodi rezulta mane ida mate no ema na’in neen sofre kanek iha ulun,liman no ain
“Karreta ne’e ha’u halai iha kotuk, derepente karreta para no halai fali ba kotuk no baku fila hodi rezulta ema ida mate iha fatin tanba karreta hanehan no nain neen kanek inklui labarik ida, nain 5 seluk diak hela”. Nia informa
Sidadaun Mane ida ne’ebé lakon vida ne’e husi Postu Administrativu Watukarbau Munisipiu Viqueque, agora daudaun mate isin iha ona nia rezidensia iha Postu Watukarbau hodi kontinua ba prosesu fúnebre tuir tradisaun família nian
Entretantu, Sidadaun na’in neen ne’ebe sofre kanek agora daudaun iha ona Sentru Saúde Postu Administrativu Iliomar hodi halo tratamentu ba sira nia liman, ain no ulun ne’ebe kanek, entre sira inklui kondutor no labarik ida
Enkuantu, tuir informasaun ne’ebe SAP News asesu katak ohin tula karau no ema husi Watukarbau ba Iliomar ne’e ho objetivu aban hodi halo lia iha Suku Tirilolo, Postu Administrativu Iliomar Munisipiu Lautém
Jornalista: Luis Pailofo