Realiza Festivál Rabilau La’os Tan Gosta Festa Maibe Promove Kultura & Identidade

Imajem : Prezidente Repúblika José Ramos Horta iha Rabilau Maubisse, 16/10/2024. Foto : Marciana da Conceição

SAPNewsTL, Díli – Estadu Timor-Leste hahú halo abertura ba festivál rabilau iha Postu Administrativu Maubisse, Munisípiu Ainaru, Prezidente Republika Jose Ramos Horta fo agradese ba governu tanba bele apoia inisiativa governu hodi realiza festivál iha Maubisse.

Festivál Rabilau hanesan baze importante ida ba Programa Nasionál Promosaun Turizmu Timor-Leste nian, iha ne’ebé ho objetivu atu hametin indústria nasionál sira iha arte no kultura, nune’e mós promove rikusoin eransa kulturál, tradisionál, no beleza naturál nasaun nian ba mundu.

Xefe Estadu José Ramos Horta fo agradese ba governu tanba bele apoia inisiativa governu hodi realiza festivál rabilau iha Maubisse.

“Agradese ba Primeiru Ministru ho membru guvernu sira ne’ebe tau matan no mobiliza  rekursu hodi apoiu projetu ka inisiativa  ida ne’e, maske iha fulan Abril to’o fulan Setembru guvernu okupadu tebes ho vizita Santu Padre ninian no Sekretáriu Jeral ONU António Guterres, apezar ida ne’e maske servisu todan”.Tenik Prezidente Repúblika Jose Ramos Horta liu hosi diskursu iha Maubisse,16/10/2024.

Xefe Estadu Timor-Leste ne’e hatutan realizasaun ba eventu festivál rabilau ho hanoin hodi promove kultura no identidade Timor nian ba mundu.

“Ba eventu ida ne’e la’os dehan ha’u pesoalmente gosta festa maibe buat ida kultura no identidade ne’e importante. Ha’u rasik ko’alia ho Primeiru Ministru ho membru guvernu hodi fó apoiu hola inisiativa ida ne’e iha Maubisse rabilau, tinan oin mai sei sai boot liu tan no turista hosi rai liur sei mai”. PR Ramos Horta sublinha

PR Horta husu ba komunidade sira hodi asegura meiu ambiente, hanoos foer no kuda ai oan sira iha munisípiu.

“Tau matan ba meiu ambiente, labele soe lixu arbiru, Maubisse ne’e lixu nakonu los tanba ne’e autoridade munisípiu sira iha obrigasaun atu mobiliza populasaun hamos foer no kuda ai iha munisípiu”. PR husu

Ramos Horta dehan otél sira iha Dili hahú nakonu tanba turista husi rai-liur mai lor-loron, maske seidauk halo promosaun iha liur tanba seidauk iha otél ne’ebé sufisiente.

“Situasaun iha Timor-Leste agora, ita buka kuartu ba otél sira iha Dili nakonu, fatin la iha tamba turista sira komesa mai barak iha ita rain kuaze lor-loron,ita konsege haree movimentasaun turista komesa mai ona maske ita ladun halo promosaun iha liur tanba seidauk halo otel ne’ebe sufisiente”. Nia sublinha

Fo hanoin fali katak, Festivál Rabilau tinan 2024 rejista programa oioin maka hanesan, “1. Aprezentasaun kulturál ne’ebé hatudu múzika, dansa, no instrumentu tradisionál Timor nian, 2. Kompetisaun arte iha pintura, múzika koremetan, no arte dijitál, 3. Kompetisaun gastronomia no feira ne’ebé hatudu hahán lokál.”

“4. Feira livru nian no bazar produtu lokál nian, 5. Aprezentasaun múzika moderna husi artista timoroan sira, 6. Atividade ba labarik sira no sinema, 7. Eventu desportu lokál sira no 8. Esplorasaun guiada ba foho Rabilau”.

Eventu loron haat ne’e sai nu’udar espozisaun kaptivante ba identidade Timor-Leste nian no konvite ida ba mundu atu deskobre beleza naturál nasaun nian.

Vizitante sira ba Festivál Rabilau iha oportunidade atu mergulha sira-nia an iha kultura timoroan nian liuhosi workshop kona-ba artezanatu tradisionál sira, vizita ho matadalan ba fatin istóriku sira, no atividade eko-turizmu nian ne’ebé hatudu paizajen furak Timor-Leste nian.

Enkuantu, abertura Festivál Rabilau sei hetan partisipasaun máximu husi governante, konvidadu no komunidade sira iha Rabilau, Postu Administrativu Maibisse Munispiu Ainaru.

Jornalista : Marciana Conceição